(usa ka higayon samtang nagtungha pa ko sa silliman, gi-imagine na ko nga 70 anyos na ko, ug namugna kining maong balak)
kini lang ba diay ang hinungdan
kanako di ka na ganahan
kay mibusyad na akong tiyan
midaghan na akong uban
mihanap na king tinan-awan
ug mokurog na akong tuhod
akong batiis sigeg paminhod
ug daling mopunga inig ginhawa
kay di na lagi makasugakod
sa pagbugsay aron makatumod
sa baybayon sa imong himaya
hain na man diay
kadtong imong giingong gugma?
lab-as lang ba diay to
sa batan-on pa ta?
ug karon napan-os na?
mao diayng wa na ko nimo bayangi
sa imong parayeg ug katawa
sa imong halok ug gakos –
kay sama sa dagat nga way bawod
langit nga way panganod
imong gugma:
unod nga way jamong bukog
written by mike ligaligLinkback:
https://tubagbohol.mikeligalig.com/index.php?topic=175.0