TUBAGBOHOL.com with Ligalig Mike Ortega

Inside Bohol => Pulong Bisaya => Topic started by: Ligalig-Mike on November 22, 2007, 11:19:16 AM

Title: Sirhan Ko Ang Akong Ngabil
Post by: Ligalig-Mike on November 22, 2007, 11:19:16 AM
Sirhan Ko Ang Akong Ngabil
sinulat ni mike ligalig

Sirhan ko ang akong ngabil
kay ang pulong moabli
sa bintana sa imong mga luha

Dili ko na ikaw pangutan-on
giunsa mo pagsugat ang kadlawon
nga wala ako sa imong kiliran -
kay bisan diay ang usa ka pulong
nga mahagbong sa akong dila
makapatay-og sa imong kalag

Sirhan ko ang akong ngabil
pugngan ang bul-og sa pulong
nga buot mogakos kanimo

Dili ko na ikaw pangutan-on
unsa ka haw-ang ang mga oras
nga wala nagapos sa atong mga bukton -
kay bisan diay ang usa ka pulong
nga mohalok sa imong dalunggan
motay-og sa atong kalibotan
Title: Re: Sirhan Ko Ang Akong Ngabil
Post by: Scarb on November 27, 2007, 07:48:29 PM
Lartz  motay-og man jud sa kalibutan?
mora diay ug linog hah? ;)

greattttt...Mike..I'm speechless...
Title: Re: Sirhan Ko Ang Akong Ngabil
Post by: hazel on November 29, 2007, 04:53:07 AM

Sirhi ang ngabil, ug palituka pinaagi sa imong mga mata. ;D

Title: Re: Sirhan Ko Ang Akong Ngabil
Post by: bisayantek on November 29, 2007, 11:05:32 AM
Pre,

Naglinog ang akong dughan ning maong balak.

Pasayloa ko, nga human nakog basa ning maong balak, nahanduraw ko ang imong amahan sa dihang didto pa siya sa ospital.

Ingon usab niini ang temperamento sa balak nga akong nasulat human sa kamatayon sa akong amahan.

Diha sa balak, natago ko ang akong kasub-anan. Diha sa balak, natago ko ang akong kamingaw sa akong amahan. Diha sa balak, nahatagan nakog dugang bulok ang akong kinabuhi ug nakakuhag kaisog ang akong kaugalingon sa pag-atubang sa tanang pagsulay sa kinabuhi.
Title: Re: Sirhan Ko Ang Akong Ngabil
Post by: Ligalig-Mike on November 29, 2007, 11:17:50 AM

Pre, kining maong balak nasulat mga upat o lima na ka tuig ang milabay. Dili kini kabahin ni Papa.

Sakto ka Pre, adunay mga pagbati sa tawo nga diha lang sa mga balak matago.

Akong mga pag-ampo nga mahatagan ug hustisya ang kamatayon sa imong amahan.
Title: Re: Sirhan Ko Ang Akong Ngabil
Post by: bisayantek on November 29, 2007, 11:22:07 AM
Kon mosugot ka, Pre, ato ning i-submit kang Omar Khalid. Iyawat usab kaambitan sa mga magbabasa sa Bisaya.
Title: Re: Sirhan Ko Ang Akong Ngabil
Post by: Ligalig-Mike on November 29, 2007, 11:36:25 AM

Okay ra ko, Pre. Basin magustohan ni Omar Khalid (aka Ritchel).
Title: Re: Sirhan Ko Ang Akong Ngabil
Post by: grazie7y on November 29, 2007, 02:46:26 PM
your balak is quite poignant, mike!  makatandog jud sa balatian...
Powered by SMFPacks SEO Pro Mod | Sitemap
Mobile View
SimplePortal 2.3.7 © 2008-2019, SimplePortal