normal_post - ‘Paraiso Sa Akong Mga Damgo’  - Pulong Bisaya Author Topic: ‘Paraiso Sa Akong Mga Damgo’  (Read 3184 times)

Ligalig-Mike

  • FOUNDER
  • GURU
  • *****
  • avatar_1_1507939928 - ‘Paraiso Sa Akong Mga Damgo’  - Pulong Bisaya
  • Posts: 18912
  • medal1 - ‘Paraiso Sa Akong Mga Damgo’  - Pulong Bisayamedal2 - ‘Paraiso Sa Akong Mga Damgo’  - Pulong Bisaya
  • Need A Website? Email me: info@mikeligalig.com
    • Share Post
xx - ‘Paraiso Sa Akong Mga Damgo’  - Pulong Bisaya
‘Paraiso Sa Akong Mga Damgo’
« on: September 15, 2009, 10:20:37 PM »
‘Paraiso Sa Akong Mga Damgo’
by Mike Ligalig
(as it appeared in the Bohol Standard's Tumoy Sa Bangaw column)

      Daghan nang nangutana kon asa sila makabasa sa balak ni anhing Presidente Carlos Polistico Garcia – kadtong balak nga kinaham sa mga Bol-anon sa ilang kapanahonan.

      Sanglit wala ka may makita nga mga libro nga binisaya nga gibaligya sa mga bookstores sa atong nasod, wala natipig ug napasa sa atong kapanahonan ang mga ginaray ni CPG.

      Sa tanto kong pinangita, nakaplagan ko ra gyud ang duha sa mga balak ni CPG nga nahiapil sa usa ka libro nga gipatik sa Ateneo De Manila University Press. Ang maong libro sa mga balak binisaya gikugihan paghagpat nila ni Don Pagusara ug Erlinda Alburo nga may pasiuna ni Resil B. Mojares.

      Walay laing presidente sa Pilipinas ang gibantogan nga ngilngig mosulat ug balak: si Presidente Garcia lang. Kining atong presidente karon, ngilngig pud: (kamo nay mosumpay).

      Adunay mga Bisaya nga kusog motamihid sa pinulongang Bisaya. Mangyam-id sila kung mogamit ka ug pulong nga dili kasarangan. Ang uban kusog moyagayaga, ug gani pa mobiaybiay sa mga sulat balak ug sa mga tawo nga mogambalay ug mga balak. Daghan na ko ug kasinatian sa mga tawo nga ubos ang ilang pagtan-aw sa pulong Bisaya. Ang wala seguro nila mahibaloi nga ang Presidente sa Pilipinas kaniadto nagpasigarbo pag-ayo sa atong pinulongan. Aduna pa kahay politiko sa atong kapanahonan karon nga may pagmanggad sa pulong kabilin sa atong mga katigulangan?

      Karong sunod tuig, ika-singkwenta na katuig human matagik ni CPG ang balak nga nag-ulohan “Dalagang Pilipinhon.” Ug karon akong ipaambit ang maong balak dinhi ning lindog sa Tumoy Sa Bangaw. Sa mga makasahid ning maong balak sa Internet, unsay maayo kung inyo ning kopyahon ug iprinta kini ug ipaambit ang balak ni CPG ngadto sa inyong mga mahal sa kinabuhi ug mga higala?

Dalagang Pilipinhon
ni Carlos P. Garcia

Mga mata mo maoy naghatag
mga bulak, sa akong kitara,
ug sa kasingkasing ko awit sa gugma;
ug kong ang mga mata mong maluming
pagataoban man ugaling sa mga luha
ako intawon Inday sa Birhen manimasin
nga didto dili unta mangatundag
ang akong paglaom ug akong himaya.

Baba mo pula-pula sama sa putot
sa rosas nga maoy pagbuklad,
ug kon ikaw mopahiyom
akong makita ang tinagoang bahandi
sa imong baba;
ang duha ka lumbay sa mga mutya
nga daw ganghaan ngadto sa himaya,
ug kong ikaw mokatawa ug motalidhay
daw among madungog ang buhagay
sa usa ka busay sa bulawanon nga kalipay!

Bulak nga himaya sa akong yuta
alang kanimo akong awiton
ang labing matam-is kong kansiyon
linangkat ning dughan nga imong ulipon.

Ug kong mohagtos ang kuldas sa akong kitara
ug ang sambagay sa dughan ko mahilom na,
ang matam-is mong ngalan, Babaye, sa gihapon
maoy halaran sa kataposan kong melodiya.

Daghan sa akong kaliwat - lahi nga tabunon
ikaw ang tag-iya sa kasingkasing ko'g kinabuhi,
ang imong kaanyag maoy milamdag
sa mangitngit nga dalan sa akong kalag;
ug kong si Adlaw sa kasadpan molundag
ug si Bulan magdumili pagsanag,
kita ko gihapon ang nindot mong larawan
sa bughawng langit sa akong dalindaman...!

Dalagang Pilipinhon,
may lawas kang nindot, bigot ug tigson,
mga lalik sa dughan mo nga lison
nagbihag kanamo ngadto sa kaluhang moto,
diin among nalantaw ang himaya sa Paraiso.
Ayaw lawas!...misinggit ang hangin mabugon
ug hangtod ang binog nga imong kaligoanan
nga nakakita ug nakahikap sa mga kurba
sa lawas mong dili tinabonan,
misulat sa sulog sa lilo niining mga pulonga:
Pagkatam-is ug katahom mo, Babayeng Pilipina...!

Babayeng Pilipinhon, anak sa damdaman ug kahayag,
way batan-on ug bayani di maibog ug mabihag,
kay ganing mga bulak sa imong pag-agi mihalok sa imong tiilan
ug malipayon nangatagas sa imong tumbanan;
ang bulan ug bitoon mipalunop sa yuta sa ilang ningdanag
aron lamang pagpamarayeg sa imong kaanyag;
pati ang hinuyohoy, miturok hubog sa gugma,
ug nahisarasay midondon ning mga pulonga:
Pagkatam-is ug katahom mo, Babayeng Pilipina!...

Ug kong ako usa pa ka batong wagas brilyante,
buot kong dugmokon ang akong kaugalingon
sa usa ka libong peraso,
aron tuhogon ug mahimong pendante
nga ika-dayandayan sa dughan mo.
Ug kon ako usa pa ka tanaman
nga naghambinay sa mga bulak, humot ug luming,
gasahan ko ikaw usa ka kolyar sa mga bulak - harining,
kinutlo didto's Paraiso sa akong mga damgo
aron lamang idayandayan sa liog ug buhok mo.

Apan, ay!... ako usa lamang ka tawong mortal,
kabos ug gikawang sa mga bahandi.
Apan gihigugma ko ikaw Babayeng Pilipinhon,
gikan sa lintunganay sa bulawan kong pagbati,
ug kong kanako isalig mo ang palad mog kinabuhi,
dad-on ko ikaw sa akong payag
ug didto's salag sa atong gugma
ikaw bugtong mutya ko ug hari,
imong kasalo pag-inom sa alak sa kalipay,
ug imong kaunong paglad-ok sa apdo sa kasakit,
kauban mo pagpanaw sa kahayag ug kangitngit
hangtod atong masampong  ang sidsid sa langit...

Linkback: https://tubagbohol.mikeligalig.com/index.php?topic=22377.0
Romans 10:9
"That if you shall confess with your mouth the Lord Jesus, and shall believe in your heart that God has raised him from the dead, you shall be saved."

Get FREE 500GB cloud storage:
https://www.pcloud.com/welcome-to-pcloud/?discountcode=fDiE7jtC01VPbCIygaM67jZV

statesville

  • EXPERT
  • ***
  • avatar_2169 - ‘Paraiso Sa Akong Mga Damgo’  - Pulong Bisaya
  • Posts: 3339
  • The best daily exercise -- walk with the Lord.
    • Share Post
xx - ‘Paraiso Sa Akong Mga Damgo’  - Pulong Bisaya
Re: ‘Paraiso Sa Akong Mga Damgo’
« Reply #1 on: September 24, 2009, 12:14:26 AM »
Kanindot ba aning pagkamugna nga balak
Akong gi print out para idugang sa akong
  collection basabasahon
Wala ko makaamgo unsa diay kabilihon ang
  atong pinulungan hangtud nga nilangyaw
  ko gikan sa atong nasud
Ang tawo morag salmon nga kon hapit
  na moabot ang tagal sa kinabuhi niya
  sagubangon ang kalisod sa bul-og sa
  tubig para lang mobalik sa ibabaw sa
  busay ug adto mangitlog ug dayon
  kamatay sa lugar diin siya giitlog
  sa iyang inahan
Pulong Bisaya, ang uban motamihid
 mao nay gitawag ug hypocrisy
Kon mag-iningles dili man ka
  mahimong si Goldilocks
  ang nawong pinoy gihapon
   ;D
Every Christian has GPS -God-Provided Salvation!
It may not guide you to everywhere you want to go in this world, but it will ensure  that you arrive safely in heaven.

Bambi

  • GURU
  • ****
  • avatar_375_1353877539 - ‘Paraiso Sa Akong Mga Damgo’  - Pulong Bisaya
  • Posts: 7295
  • medal1 - ‘Paraiso Sa Akong Mga Damgo’  - Pulong Bisaya
  • Life is hard but a perfect dream to live on....
    • Share Post
xx - ‘Paraiso Sa Akong Mga Damgo’  - Pulong Bisaya
Re: ‘Paraiso Sa Akong Mga Damgo’
« Reply #2 on: September 26, 2009, 05:27:54 AM »
Daghang salamat Mike sa  imong pagpatik ning bulawanong balak sa atong anhing Bol-anong Presidente Carlos P. Garcia.  Karon pa gjod naho ni mabasa.  Pagka-anindot, matam-is kaayo ang  iyang pagtagik sa mga matag pulong ug linya nga iyang gipahinungod sa dalagang Pilipina.



Share via facebook Share via linkedin Share via pinterest Share via tumblr Share via twitter

xx
Dayon Sa Akong Kalibutan

Started by Ligalig-Mike on Pulong Bisaya

0 Replies
1997 Views
Last post April 26, 2007, 06:09:43 AM
by Ligalig-Mike
 

SMF spam blocked by CleanTalk
Powered by SMFPacks SEO Pro Mod | Sitemap
Mobile View
SimplePortal 2.3.7 © 2008-2019, SimplePortal