alang kang Ana ug sa pagsubang sa iyang adlaw
(ang unang upat ka linya pasidungog kang Javier Galvez)
Ang silak sa adlaw
Nga sayo kaganihang buntag
Ningsulod sa atong lawak
Nga way pananghid
Ug sa tibuok adlaw
Naghatud og kainit ug kalandag,
Hinay-hinay nga mibiya
Sa ganghaan sa kilum-kilum
Ug kalit nga na-wa
Diha sa kagabhion,
Uban kanimo.
Ang tamparos nga kasilak
Gitaban ’sab ang imong kasing-kasing
Ug karon inanay nga nahilis
Ang kadasig sa imong ngabil,
Inanay nga naugdaw
Ang kainit sa imong hapuhap,
Inanay nga namugnaw
Ang kasibot sa imong gakus.
Gitaban ka sa adlaw;
Ikaw ug imong kasing-kasing;
Ug ako diri nahibilin
Inusara nga nagsud-ong
Sa naghulaw nga kagabhion.
Linkback:
https://tubagbohol.mikeligalig.com/index.php?topic=2733.0