Ang Paghibalik
(for my father)
sinulat ni M. Ortega Ligalig
Inig mahuwad na ang kataposang awit
niining lawak kalingawan nga gisabak
sa aso ug sigarilyo
ug sa naugang botelya sa beer,
ihatod ang akong mga tiil daplin
sa Fuente Osmeña,
pahanggapa ako sa lab-as nga hangin,
pandongi ako sa kinidlap sa mga bituon,
paraha ang taxi
(dili ako mopadulong sa Manalili)
(dili ako mopaingon sa Carbon)
ihatod ako sa Colon
ug tawga ang traysikad sa eskina,
ihatod ang akong mga tunob daplin
niadtong tulay nga nahubsan sa sapa...
pangitaon ko pag-usab ang akong mga luha
nga misagol sa kataposang dangoyngoy sa ulan
unya biyai ako nga mag-inusara daplin
sa tulay nga saksi sa akong kasub-anan
biyai ako nga mag-inusara
atbang sa punerarya
maghandom kang Papa
Get FREE 500GB online storage:
https://www.pcloud.com/welcome-to-pcloud/?discountcode=fDiE7jtC01VPbCIygaM67jZVLinkback:
https://tubagbohol.mikeligalig.com/index.php?topic=90616.0
Topic: Paghibalik (Read 1349 times)