Nganong Wala Ko Ikaw Makita
sinulat ni michael ligalig
Ang imong anino milabay
sa tiilan sa adlaw -
apan wala ko ikaw makita.
Misunod kas huros sa hangin
paingon sa kasadpan, subangan -
apan wala ko ikaw makita.
Ang imong mga mata nga tugob
sa katam-is sa manggang hilaw
naligo sa atabay sa panganod -
apan wala ko ikaw makita.
Misangyad ang imong lapa-lapa
sa batiis sa mga amigas -
apan wala ko ikaw makita.
Ang imong gininhawa mipalong
sa tanang kandila sa sementeryo-
apan wala ko ikaw makita.
Ang imong laway mibaha
sa tanang suok sa bulkan-
apan wala ko ikaw makita.
Natulog ang imong buhok
sa tumoy sa akong pilok-
apan wala ko ikaw makita.
Linkback: https://tubagbohol.mikeligalig.com/index.php?topic=7661.0
