Gisulat alang sa usa ka column sa The Bohol StandardAkong amigo diri sa Thailand nagwala hapit kay gibuwagan sa iyang uyab gahapon sa Valentine’s Day.
Isip higala, akong gipaminaw ang mga yangongo ug pagmahay ngadto sa babaye nga mao untay natingban sa iyang pagmahal. Dili lang nako hinganlan akong amigo kay basin naay nakaila nga magbabasa.
Ako siyang giingnan, human niya giyagyag ang iyang mga kasakit samtang nagsakay mi sa sakyanan sa laing usa ka higala, “Gibuhat mo na ang tanan apan ang babaye nagmakuli man nga mamalik ang tanan. Dawata ang nahitabo. Normal nga maguol ka karon, apan molabay ra kining tanan. Tingali si (blank) dili gyud angay para kanimo. Basin adunay linalang nga naghulat kanimo nga takos halaran sa imong tiunay nga gugma.â€
Gisulti ko kini sa English kay dili man to Filipino akong amigo. Sa akong paghubad karon sa atong pinulongan, dili malikayan nga manuyhakaw ug manglugmaw kining mga timgas pulong Bisaya. Padayon sa estorya.
Mao lagi, sayon ra man motambag ug molitok sa mga pulong nga makapahupay sa kagul-anan sa uban, apan kung kita na ganiy hingtungdan, ambot ug mahinumdum pa ba ta sa atong gipangsulti sa uban.
Mosinghag ra ba ning uban tambagan ug dayong ingon: “Tambag-tambag, labaw pug kang tambagonon!â€
Kung sultihan ka ug ingon niana sa usa ka tawo nga nagmagul-anon, ayaw ikasakit kini nga mga pulong. Ang tawo nga naa nagping-it sa kasakit sa mga gumunhap sa kinabuhi dili makahuna-huna ug tarong ug mao makalitok usahay sa mga pulong ikahiubos ra usab sa iyang higala.
Lain-lain ang paagi sa atong pag-atubang sa kaguol. Ang uban moingon nga gamay lang ni nga problema bisan dako na kini alang kanimo. Ang uban magtuo nga labihang bug-ata sa imong suliran, apan alang nimo “chicken†lang kini.
Ang problema, madako ug magamay, pareha ra problema nga nagkinahanglan ug kasulbaran. Ang samad nga gamay kung dili tambalan mahimong matitanos. Ug nasayod na ta unsay lintunganay sa titanos.
Balik sa estorya sa akong amigo. Mao lagi to, gi-etsapuwera siya sa iyang uyab gahapon. Kaunom siya motawag aron unta mo-greet ug Happy Balentong apan wala siya tubaga. Gi-off hinuon sa babaye ang iyang cellphone. Migabii nalang wala motawag ug balik ang babaye. Sagol pangagho ug panghupaw ang mialisngaw sa tutonlan sa akong amigo.
Ug ang akong amigo nga naminaw sa estorya nakatug-an hinuon sa wa damha nga niadtong tulo na ka tuig ang milabay, sa adlaw sa Valentine’s Day pud, gi-impeach siya sa iyang uyab sa katarongan nga wala niya hisabti sa sinugdanan apan nasabtan na niya ang tanan karon. Dili na ko mohisgut ug unsa nga katarongan kay lisud na.
Madula-dulaon ang kinabuhi.
Asa pa hinuon tong adlaw nga gilantaw sa kadaghanan nga espesyal alang sa nagminahalay mao hinuon ang adlaw sa pagbangutan.
Dili baja pud lalim nga buwagan ka ug uyab sa Valentine’s Day. Wala nalang gyud kahuwat ug palabya ang February 14. Bisan nalang unta to sa petsa trese o kaha sa paghagtok sa petsa kinse. Naa gyuy mga babaye nga maldeta. Pwera lang sa mga buotan.
Happy Valentine’s alang sa mga maldeta nga rosas kansang mga tunok mitusok sa buko-buko sa buyog nga nahinanok na unta.
Linkback:
https://tubagbohol.mikeligalig.com/index.php?topic=18004.0
