Inside Bohol > Bisaya Cebuano Language

Nahinumdoman Ko Ang Sierra Madre by Mario L. Cuezon

(1/1)

MikeLigalig.com:
Nahinumdoman Ko Ang Sierra Madre
sinulat ni MARIO L. CUEZON

Di ko malimtan ang tubig,
ang mga batong akong gipamunit,
ang mga sugilanon, ang pinulongan,
ang awit nga gitudlo namo
sa mga batang Dumagat,
UP Naming Mahal
gihimong Yokyok Namong Mahal.
 
Didto ko unang nakabatyag nga kagamay ko ba
sa ilawom sa higanteng mga kahoy,
wa hilabti sa mga siglo,
ang basa nga yuta sa ilawom niini,
ang dagkong mga punoang
di magakos og tulo ka tawo,
kadtong lugar nga halos wala nay Adlaw.
 
Unang pagkurog ko atubangan
sa likod sa taas ug itom nga halas,
parehas kadako sa akong kamot
ug usa ka gamayng bato lamang ang akong dala.
 
Didto ko unang nahadlok og lamok tungod sa malarya.
Kadtong batan-ong magtiayong Dumagat,
may dalang batang gihilantag usa na ka semana.
Dili sila pasakyon sa fierra kay wala silay pamilete.
Gibayran namo sila. Gihatod sa tambalanan.
 
Karon nahinumdoman ko na pod ang Sierra Madre
samtang nag-atubang sa nagkaupaw nga Malindang.
Unsa na kaha ang gidangatan sa iyang lasang?
Unsa na kaha kon gipugngan ang iyang tubig?
 
Dili ko gustong maghunahuna niini
bahin sa Sierra Madre,
nga naglubong kanako sa mga paghandom
sa kabatan-on kong nanglabay na.

Linkback: https://tubagbohol.mikeligalig.com/index.php?topic=86561.0

Navigation

[0] Message Index