MikeLigalig.com

Health Notes
Ni Prof. Copello
Disyembre 23, 2009
 
A chronic respiratory disease marked by labored breathing, chest constriction and coughing.
Hubak, ang sakit nga labihang lisora palandongon kay kon mosugmat o mosul-ong, ingon sa makaugtas sa gininhawa sa pasyente ang hutoy nga morag walay kataposan, mag-utong-utong. Sakit nga makauulaw ug makahasol kaayo kay kon mosul-ong, dili gayod kapugngan ang pag-ubo bisan pa sa atubangan sa daghang tawo. Maoy hinungdan nga ang mga hubakon magdala-dala gayog tambal ug ginamiton nga mahimong magamit dayon sa higayon nga moaksiyon pagsugmat ang maong sakit sa bisan diing dapit nga ilang nahimutangan sa bisan unsang panahon, adlaw man o gabii.Hinuon sa kalungsoran ug mga siyudad daghang tambal sa botika lakip ang mga ginamiton nga mahimong makasanta sa maong balatian kon kinahanglanon. Ugaling lang kay mahal ang maong mga tambal, dakong gasto alang sa mga kabos nga nagkalisod kanunay sa panapi. Maoy hinungdan nga ang kadaghanan modangop na lamang sa mga tambal nga walay gasto tungod kay makita kanunay sa kasilinganan samas mga mosunod…

Atis
– Magkuhag 10 ka gulang dahon, 4 ka dahon sa gabon ug ½ sa pulgada nga luy-a, lagaon sa 3 ka baso nga tubig. Bahinon tulo ka parte nga imnon 3 ka subli sa matag adlaw hangtod nga mahumpay ang hubak.
Botonselio
– Maglaga 10 ngadto sa 15 ka bulak sa 2 ka baso nga tubig. Ang maong linaga ipainom sa pasyente tulo ka subli sa matag adlaw.
Comfrey
– Maghumol og dahon sa init-tubig aron paimnon ang pasyente ½ ngadto sa usa ka baso, duha ka subli sa matag adlaw, sa buntag ug sa dayong pagkatulog sa gabii.
Mahimo sab nga kan-on diretso ang lab-as nga dahon kutob sa gusto aron daling mahumpay ang makaugtas sa ginhawang hubak.
Elepante
– Lagaon ang tibuok tanom, mga gamot, punoan lakip ang mga dahon sa igong gidaghanon sa tubig aron mapainom ang pasyente ½ sa baso sa matag 3 ka oras.
Kalatsutsi
– Likiton ug tabak-on ang uga o layang dahon sama sa sigarilyo.
Kapayas
– Lagaon ang igong gidaghanon sa lab-as nga mga dahon sa igo usab nga gidaghanon sa tubig aron mapainom ang pasyente ½ sa baso sa lat-ang nga 3 ka oras.
Kipikipi
– Sagolon paglaga ang mga gamot, punoan-bagon, mga dahon ug mga bulak, dili isog ang templada, igo lang magdalag ug diyotay ang kolor sa linaga. Paimnon ang pasyente ½ ngadto sa 1 ka baso sa lat-ang nga 2 ngadto sa 3 ka oras.
Maayo imnon ang maong linaga, susama ra sa ordinaryong tubig kon dili isog ang templada. Usa ka aphrodisiac, makapadugang sa gana nilang Undo ug Inday sa dula sa kama.
Kamunggay
– Magkuhag panit nga baleg 2 ka pulgada kuwadrado uban sa gamot nga bale 2 sab ka pulgada ang gitas-on, lagaon sa 3 ka baso nga tubig. Paimnon ang pasyente 1/4 sa baso sa lat-ang nga 3 ka oras. Medyo lisod imnon ang maong linaga tungod kay laig lami pero kinahanglang agwantahon aron mahumpay ang hubak. Hinuon, mahimong mokaog gamayng kamay aron dili makasuka.
Kugon
– Lagaon ang mga suwa sa kugon, mas daghan mas maayo tungod kay maayong imnon ang maong linaga nga medyo tam-is-tam-is, makahatag kabugnaw sa atong ginhawaan. Wala kiniy overdose busa mahimong imnon sa tanang panahon nga uhawon ang pasyente.
Oregano
– Mahimong imnon diretso ang lab-as nga duga, 1 ka kutsara sa dagkong pasyente, ug ½ sa kutsara sa mga bata. Mahimong templahag gamayng kamay o asukar ang lab-as nga duga kon ang pasyente maglisod pag-inom.
Mahimo sab ihumol sa init-tubig ang dahon ug paimnon ang pasyente ½ sa baso sa matag 3 ka oras.
Tawatawa
o Salingkapaw (Gatas-gatasan) – Lagaon ang tibuok tanom, gamot, punoan, mga dahon ug bunga, sagolon sa igong gidaghanon sa tubig. Paimnon ang pasyente ½ sa baso sa matag 3 ka oras.
Mahimo sab nga sunogon ang layang sagbot tungod kay ang masingong aso mahimong makahatag alibyo sa hubak.
Sambag
– Magkuhag igong gilapdon sa panit, 4 ka pulgada kuwadrado lagaon sa 3 ka baso nga tubig. Paimnon ang pasyente ½ sa baso sa lat-ang nga tagurha ka oras.
Sampaguita
– Ang mga gamot lagaon sa igong gidaghanon sa tubig nga igong mainom sa pasyente ½ sa baso 3 ka subli sa matag adlaw.
Mahimo sab nga ang mga bulak, usa ka kumkom ang ihumol sa usa ka baso nga init-tubig nga ipainom sa pasyente ½ sa baso matag 3 ka oras.
Sorosoro
– Ang lab-as nga duga, 1 ka kutsarita, ipainom diretso sa pasyente, 3 ka subli sa matag adlaw.
Talong
– Lagaon ang mga gamot sa igong gidaghanon sa tubig nga mapainom ang pasyente ½ sa baso sa matag 3 ka oras. Mahimong dugangan ang dosage ngadto sa tagsa ka baso kon gikinahanglan.
Eucalyptus
– Kumoson ang 3 ka kutsarang lab-as nga mga dahon o 2 ka kutsarang pinauga nga dahon ug pabukalan o lagaon sulod sa 15 minutos sa 8 ka baso nga tubig.
Pabugnawon ang linaga, salaon, ug paimnon ang pasyente tagsa ka baso 4 ka subli sa matag adlaw.
Kining eucalyptus maoy tanom o kahoy nga ginakuhaan sa daghang matang sa tambal alang sa mga bata ug mga hamtong nga nagkinahanglag maayong mga panghaplas o pangbanyos nga halang-halang.
Sa gihapon, among gipahinumdom dinhi nga ang ½ sa baso nga dosage sa lat-ang nga 2 ngadto sa 3 ka oras maoy labing maayo, epektibo, luwas, halayo sa peligro ang pasyente.—

Linkback: https://tubagbohol.mikeligalig.com/index.php?topic=87686.0