Matunaw Ko Sa Kahayag Sa Imong Mga Matasinulat ni Mike Ortega Ligaligmatunaw ko sa kahayag sa imong mga mata
daw sama sa adlaw ang imong pagtutok kanako
sama sa x-ray ang imong tinan-awan
ug imong gianinaw ang nataran sa akong dughan
imong gisusi ang matag suok
kung nagtindog ba ako tupad sa imong pahiyom.
matunaw ko sa kahayag sa imong mga mata
kahayag nga milapos sa lihokan nga kangitngit
ug mipahawa sa nagkalanrakas nga kasaba
buot ko mutago sa kurtena sa kagabhion
magpasalipud sa bulan
ug motago likud sa mga bituon
aron maka-ikyas ako
gikan sa mga kamot sa imong mga mata
nga buot mohukas sa sapot sa akong kahilom
hunong na sa pagtutok kanako
kay basin ang kahayag sa imong mga mata
mahimong anino sa eskina sa akong damgo
Linkback:
https://tubagbohol.mikeligalig.com/index.php?topic=213.0