Author Topic: Mananaog Nga Hugpong Sa Balak  (Read 2591 times)

bisayantek

  • STUDENT
  • *
  • Posts: 130
  • I will defend to death your freedom of speech.
    • View Profile
    • Amazing Herbs and Oils
Mananaog Nga Hugpong Sa Balak
« on: September 05, 2007, 09:46:20 AM »
Kining hugpong sa balak nga giulohan og PAGPAMILIG BATO UG UBAN PANG BALAK maoy nakakuha sa UNANG PINASIDUNGGAN sa GAWAD KOMISYON 2007 nga gipahigayon sa Baywiew Park Hotel sa Roxas Blvd, kanto sa U.N. Avenue, Manila niadtong Agosto 31, 2007.

Kompletong Talaan sa Mananaog sa Hugpong sa Balak ug mga hurado:

Unang Ganti, “Ang Berdeng Bayolinista Ug Uban Pang Balak” ni Ester Tapia; Ikaduhang Ganti, “Witik-witik Sa Hangin Ug Uban Pang Balak” ni Merlie Alunan; Ikatulong Ganti, “Paglamat Ug Uban Pang Kalisang Sa Kahilom” ni Omar Khalid; Unang Pinasidunggan, “Pagpamilig Bato Ug Uban Pang Balak” ni Eleazar Tutor Acampado; Ikaduhang Pinasidunggan, “Mga Lusok Sa Dag-om” ni Noel P. Tuazon; Ikatulong Pinasidunggan, “Guinsaugon Ug Uban Pang Mga Balak Nga May Kalabotan Sa Dakong Trahedya” ni Gerardo Vestal.

Mga Hurado: Dr. Marjorie Evasco – Tagsiya sa Hunta sa Maghuhukom; Dr. Jaime An Lim – sakop; Atty. Junne Cañizares – sakop.—



PAGPAMILIG BATO
Nagdali ang mga kamot nga mamugna
Ang bukid sa graba sa uhawng baybayon
Aron dili maapsan sa nagkadaiyang bulok
Nga gisabwag sa nanghuyatid nga Adlaw.

Ang kataposang hakop sa mga brilyante.
Maoy gihimong tore.

Human maag-ag, gihat-ad
Sa lamesa. Sama sa pagmakinilya,
Nagtinaginso ang luspad nga mga tudlo.
Gidakop ang itom gawas sa puti.
Gibulag ang patay sa buhi.
Gilabay ang dunot.
Gibilin ang walay buslot.

Ang tuktugaok sa mga manok nagpangawhat
Sa lapoyng mga kamot.
Nagkurap-kurap ang ilo nga mata
Sa nagbilar nga lamparilya
Nga nag-iwag sa taro sa Rebisco
Nga hamabaw sa napili nga mga bato.

Niini, miluhod ako ug nagsugod
Sa pag-ampo.


PAGPAMALING

Nasapid sa lingulingo ang pangutana
Ni Doro kang Baleleng. Bisan giunsa pag-uyog-uyog
Ang relo de pulso parehas gahapon
Ang gitubag sa tawo.

Dili ikalilong nganong pista
Alang niya ang pagkatawa
Sa babaye nga nagdala
Og relo nga dili sama sa iyaha.

Bisan makalutog lambay sa panit
Ang kainit dili subo nga makapugong
Pagrumbo sa tumoy aron sipongon
Ang mga katawa.

Apan unsay kalipay kon ang katawa milusot
Sa naglingabngab nga bulsa ug maoy nasahid
Ang mga binuongan, buak nga botelya,
Lata sa sardinas ug sachet sa Tide?

Tingali, panahon na nga sutaon
Kon husto ba ang pagtuyok
Sa mga kamot sa akong taknaan.


PAGPAABOT

Gihandom kong madungog ang dahunog
Sa de kahong motorsiklo samas otso kabalyos nga Robin.
Gusto ko nang mahanggap
Ang kahumot sa dugo
Sa tulingan nga giputos sa selopen.
Gisaad mo nga mag-uban na usab kita
Pagkuskos sa himbis sa tabudlos nga namilit-pilit
Sa kahoyng kahon daw tipaka
Sa buak-buak nga salamin.

Gipunaan akong baba
Sa paghunahuna nga dili makita
Ang North Star ug nagpaabot
Sa lapyahan ang Seven Star.
Nangurog ang kamot nga nagpaiwag
Sa tapyas nga Buwan samtang gihapyod-hapyod
Ang nangagkot nga buhok ni Nanay.

Sa paghilom sa pagsulog-sulog
Sa nagbilar nga mga gangis,
Mikulitog sa dalunggan ang pulong
Nga gipadpad sa bugnawng hangin.

Ayaw kamog kabalaka
Nahutdan lang kog gasolina.



UNANG ULAN SA HABAGAT

Gipupo sa hangin ang nagda’g nga mga dahon
Sa Bitaug ug gisayaw-sayaw nunot sa kumpas
Sa musika sa panaghalok
Sa mga balod ug bato sa baybayon.

Mikagiw ang kagutom dihang gitagsa-tagsa
Pagpanikop sa mga mata ang mga lusok
Sa ulan nga mitusok-tusok sa gisagbay
Nga pukot nga naghulat sa kamot sa mamunaay.

Kon ania si Tatay, dili niya pasagdan
Nga moagos ang ulan ug maghimo
Og dalan-dalan paingon sa lapyahan ug dugangan
Ang kaparat sa dagat.


PAGSUL-OB SA SAPATOS

Makuti nga buhat kining gibilin
Mo nga tahas. Sayod ka wala ko kasulay
Pagsul-ob og sapatos samas imoha
Labi nang maglakawng mag-inusara.
Naa ra kog hawid-hawid
Sa kang Nanay nga saya.
Dili sab mohaom kining wangkig kong tiil.
Apan si Nanay nagkalingawg maymay
Iyang pulong maoy laylay
Nagpatulog sa akong panghayhay.

Nangatawa ang mga tawo nga nagsul-ob
Ko sa daan nga puting sapatos.
Klaro man god kaayo nga bakikaw
Ang akong paglakaw-lakaw.
May miingon pang mora kog payaso
Naglikayng makatunob sa imong anino.

Pero wa nako paminawa. Wa tangtanga.
Nakasabot nako nganong wa ko ikaw makita
Nga mireklamo bisan mihuot
Ang imong tiil sa gimanggad nga sapatos.

Karon, isaad ko. Adlaw man o gabii, tarongon
Sa pagdala aron angayan ug dili ikaulaw makita
Ang gihibut-an nga lapalapa.



USA KA BUNTAG SA IMONG PAGPAMENTANA NANA LELING

Nakigromansa ang imong hunahuna
Sa mga bata nga nagdakop-dakop
Sa mga kagiki ug katawa nga nangaligid
Sa tsokolateng bunbon.
Wala matago sa imong mga mata ang paghinay
Sa pagpangapusgay sa mga balod sa lapyahan,
Ang wala nay umoy nga pinisik nga nagpangawhat
Sa nagkatag nga samo ug lusay nga gidula-dulaan
Sa kabataan, labi na ang pagpalawod
Sa mga bigiw sa Bitaugan.

Abtik na ang imong mga kamot
Nga mikab-ot sa garapa sa lana nga nagtungkawo
Sa altar. Dali mo kining gibuksan ug ang sulod gipatulo
Sa palad. Makalingaw kay ikaw nahimuot.
Usa ipahid sa ulo, imong gisimhot-simhot.

Bisan bali, ang imong sudlay nag-iway
Og mga dalan-dalan gikan sa itaas paubos
Sa nagdunghay sa abaga nga puting buhok.
Sa natandangan sa Adlaw, nagkidlap-kidlap
Daw brilyanteng mga lanot.

Pero dili sama gahapon,  wala nimo paak-paaka
Ang sudlay nga gama sa bayanan sa pawikan.


PAGPANAMIN SA DUGHAN
Nalubog ang panan-aw nga dili na mahikap
Sa tudlos mata ang kastilyong bunbon,
Ug mga batong hait ug talinis ang natumban
Sa mga lapalapa sa paghandom.
Nahulog ang tambol sa dughan nga nagsud-ong
Sa kasko sa Seven Star nga gitamnan
Og sibuyas ug ahos, ug ang katig gisugnod
Sa gipabukal nga kan-ong baboy.
Nabugto ang tahi sa baba nga naglantaw
Sa gipakilo nga mga tingga
Labi na sa pukot nga gigamit nga pangsikop
Sa mga hawo ug manok.

Niini, gusto ko nang mahimong tunok
Sa tulingan o tabudlos aron isahog
Sa kamanyan ug insenso nga ipaaso
Sa sakayang magpalawod nga sakyan
Sa bag-ong mananagat nga may kalig-on
Mamugsay paingon sa pikas baybayon nga gidag-om.


PAMILACAN
Hagbay rang gibuslotan
Sa Amihan ug Habagat,
Sa parat, sa abog, sa ulan,
Sa pagpaabot sa mga pirata
Ang paril nga bato sa dagat.
Halos di ko na makita
Sa tore sa bantayan ang ihawan
Nga atop ang langit.
Gisalipdan kini
Sa mga palwag lukay
Sa limbahong lubi.

Kini ba ang hinungdan nganong gipanghambog
Nga milubad na ang pulang bulok sa imong bunbon
Ug mialisngaw na ang pulang tina sa tubig-dagat
Kay gihigop sa imong mga anak?

Apan nganong ania gitugaw ako
Sa kahilom sa tak-om nga mga baba
Sa putol nga mga ulo
Sa balilan, sanga, lumod ug iho —
Mga misteryosong linalang nga nanggilinya
Ingong mga sundalo nga nagbantay
Sa ngabil sa imong baybayon?
Ug nganong nagpalayo
Ang mga lumod sa Lores?
Nahadlok ba silang gukdon
Sa kidlap-kidlap sa akong kamera?

Hinaut, dili mapapas sa kanbas
Sa hunahuna ang gipintal nga hulagway
Sa imong pagginhawa.





Linkback: https://tubagbohol.mikeligalig.com/index.php?topic=4085.0

unionbank online loan application low interest, credit card, easy and fast approval

pioneer

  • To God be the glory alone
  • FOUNDER
  • GURU
  • *****
  • Posts: 18911
  • stay at home
    • View Profile
    • spiritual preparation
Re: Mananaog Nga Hugpong Sa Balak
« Reply #1 on: September 13, 2007, 08:26:14 AM »
Congratulations, Pre!

Padayon sa pagpanulat!

Linkback: https://tubagbohol.mikeligalig.com/index.php?topic=4085.0
Romans 10:9
"That if you shall confess with your mouth the Lord Jesus, and shall believe in your heart that God has raised him from the dead, you shall be saved."
👇👇👇
Na-try mo na ba yung Tala app? Reliable sa unexpected expenses at laking tulong sa future! Use this code 9SO1TSL or visit www.tala.com to sign up!

bisayantek

  • STUDENT
  • *
  • Posts: 130
  • I will defend to death your freedom of speech.
    • View Profile
    • Amazing Herbs and Oils
Re: Mananaog Nga Hugpong Sa Balak
« Reply #2 on: September 13, 2007, 01:21:18 PM »
Daghang salamat, Pre.

Ang pagpanulat kabahin na karon sa akong pagpakabuhi. Sa akong pagbangon, sa akong pagbiyahe paingon sa trabaho, sa akong pagtrabaho, sa akong pag-uli, sa akong pagpakighagwa kang misis uban sa duha ka anghel ug hangtod na sa pagkatulog.

Walay sama kanindot sa pagbugtaw sa katahoman sa kinaiyahan ug pagpakabuhi bisan matilawan nato ang pait, parat ug tam-is nga mga lamas sa pagpakabuhi.



Linkback: https://tubagbohol.mikeligalig.com/index.php?topic=4085.0

unionbank online loan application low interest, credit card, easy and fast approval

Macky Ferniz

  • EXECUTIVE
  • EXPERT
  • *****
  • Posts: 2606
  • "The Sophomore's Dream"
    • View Profile
Re: Mananaog Nga Hugpong Sa Balak
« Reply #3 on: September 14, 2007, 01:53:49 AM »
Tugoti ako nga mohatag ug gamay nga kalamdag.

Creative ang maong mga balak ug naga hulagway sa karong nga panahon.

Bale na hulog kini sa hugpong nga maka bag-o kon "Modern Contemporary Poetry" sa Iningles nga pagka sulti.

Ang akong gipangita ug wala pa nako nakit-i dinhi sa tubag Bohol mao ang lubos Bol-anon nga Balak kon "Classical Boholano Poetry".

Kining maong mga balak akong nadungog sa akong palibot apan wala kini mahipatik. Mga balak nga gi mugna sa mga yanong Bol-anon, sama sa mangingisda, panday, mag uuma ug uban pa.

Linkback: https://tubagbohol.mikeligalig.com/index.php?topic=4085.0

Happy

  • the beauty of nature
  • GURU
  • ****
  • Posts: 9579
  • Ang "Bugon" ni ate Bambi
    • View Profile
Re: Mananaog Nga Hugpong Sa Balak
« Reply #4 on: September 14, 2007, 03:43:13 AM »
"There's no perfect life, but we can let God fill it with perfect moments"

unionbank online loan application low interest, credit card, easy and fast approval

Tags: