Inside Bohol > Bisaya Cebuano Language
Karong Adlawa ni Kei Valmoria Bughaw
(1/1)
MikeLigalig.com:
Karong Adlawa
ni Kei Valmoria Bughaw
Tin-aw ang langit apan gakanta ang mga gangis
Nga murag dunay nagsingabot nga uwan.
Ang mga kahoy gakurog, sama kanako,
Matag pagdat-ol sa atong mga panit.
Makahinumdum ko kanimo sa hangin
Nga nagahupaw diha sa kakahuyan
Nagakanta og mga kanta nga madungog
Bisan sa mga lagyo nga bituon.
Buot nakong tabunan ka og mga halok
Hangtud mubiya ang kasubo,
Maabwag sama sa mga laya nga dahon
Diha sa pagduaw sa huyohoy.
Karong adlawa buot unta nakong suroyon
Ang kahumayan kuyog nimo
Samtang galurat ang adlaw,
Masinahon sa kahayag sa atong mga nawong.
Apan kilomkilom na.
Tana, magkuyog nalang ta
Ngadto sa naglaray nga akasya
Ug gunitan ko ang imong kamot.
Pasagdan nato mangigi ang mga engkanto.
Kay mututok gyud sila sa atong katahum,
Ang katahum sa duha ka tawo
Nga wala na’y ugma.
Linkback: https://tubagbohol.mikeligalig.com/index.php?topic=89412.0
Navigation
[0] Message Index
Go to full version