Kanus-a Ako Mahimong Gawasnon Sa Pagkauliponni M. Ligalig
Composed in 2002
Mati, Davao Oriental1.
Kaganiha lang nangutanan si Junfer,
akong iga-agaw, kung gawasnon na ba ako
sa mga paghandom kanimo.
Gitubag ko siya sa text
nga sa gihapon sama ka
sa usa ka gamhanang animo
nagpahipi, andam moangkon ning hunahuna.
2.
Gawas sa Tourism Dormitory sa Mati
nagpaharuhay ko sa agbay sa kamingaw sa palibot
ug sa hamis nga hangin, naghangad-hangad
sa binuklad nga mabituon nga langit.
Misulod ko sa usa ka restaurant, miinom ug tubig,
ug akong naaktohan sa salida sa TV -
ang mga artista: Charmaine Arnaiz ug John Estrada -
sila ra akong nailhan.
Sa hilom gipugngan ko
ang pagpanghupaw ning dughan
kay nakita ko ikaw pag-usab
sa panagway ni Charmaine Arnaiz.
3.
Ang iyang mga mata malulot;
sama gyud kamo ug ilong -
linya sa kilay -
korte sa nawong -
kaluha kamo ug aping;
ug sama ang plastar sa buhok.
Ug kung si Chairmain mopahiyom
sama kanimo madaliton,
sama kanimo madanihon.
4.
Gisud-ong ko si Charmaine sa makadaghan
ug nalumsan ako sa kamingaw.
Kanimo.
Wala ko humana'g tan-aw ang salida,
miadto gilayon ko sa kwarto,
gitagik kining balak
pamasin, bisan kita wala na magkita,
dugay na -
mahimo akong gawasnon sa pagkaulipon -
mahimo akong gawasnon sa mga paghandom.
Kanimo.
Linkback:
https://tubagbohol.mikeligalig.com/index.php?topic=13810.0