MikeLigalig.com

Di mo na makita ang imong giusap
Nga mga bala nga naglumba
Paglupad punting sa milingay nga Adlaw.
Di mo na mahikap ang abo sa nasunog
Nga papel de hapon.
Di mo na mahanggap ang alimyon
Sa rosas nga nalaya
Sa banagbanag sa bantawan.

Pero alang nimo way sapayan. Ang imong panan-aw
Misay-a sa mga katawa
Nga mikabayo sa kanyong gikatayan
Sa nagpamulak nga kadena de amor.
Milingiw ka man gani sa singgaak
Sa babayeng naghikyad og sitserya sa pulta-mayor
Sa Lyceum, Palasyo del Gobernador ug Fuerza Santiago.
Miaslay ang natibuok nga tingog
Dili masawod bisan ihunghong
Sa dalang imbudo nga bag-ong gihinloan
Sa mga pasalig nga mituok
Sa kampana sa Manila Cathedral.

Apan kon imong lingion ug sud-ongon
Sa tinupihang bermuda ang mikamang
Nga golf ball paingon sa bandila,
Imong masuta unsaon pagsawom
Ang tropeyo nga makatang-on
Sa nagpusagak nga tubig sa duha ka busay
Sa imong pagka tawhanon.


Linkback: https://tubagbohol.mikeligalig.com/index.php?topic=5535.0