Mama, Si Papa
(ni Glacier_71)
hunong na
sa imong paghilak
pahiri na
ang imong mga luha, midagayday
sa samad sa akong kasingkasing, gihilab
sa mahaitong suwab sa kasakit
gumikan kay gilaksi na sad ikaw karon
sa mabangisong pangutana
kung hain na
si papa
kupkupon ko
ang imong mga panghupaw
sama kalawom ning kadlawon
apan sukmati ayaw kining iyang pangisip, milupad
ngadto sa nagkahanap nga panganod sa kalibog
ug sud-ongon na lang ang balatian, mikapaykapay
aron pagsakmit na sad ngadto sa wanang
kang papa
lakaw sa
ako na sad ang mosapnay
sa mabug-at nga palas-unon nakita
ko's iyang mga mata, miangkla
sa kong mga abaga
ug balik ngari unya, mopaagas
kita sa mga luha
basin na lang matagbaw
kining gutom nga kangitngit, misakmit
sa tukbilong pangisip
ni papa
nitupad ako sa paglinkod
ako siyang gipangutana
kinsa ako? unsay akong ngalan?
nanghawid siya sa pisi
sa iyang panumduman
kalooy sa akong amahan, nakabuhi
ang iyang hugot nga kapyot
ug sa unang higayon natagak
ang mga pulong niya kanako
"ikaw si pedro, usa ka sundalo"
ug gihagkan ko
si papa
ma,
si papa
wa na nako makaila
ug nitubod, nidagayday ang mga luha sa
akong mga mata...
(Basin og nakadumdum ka karong adlawa, akong kinasingkasing pagtimbaya sa imong adlawng natawhan.)
Linkback:
https://tubagbohol.mikeligalig.com/index.php?topic=19364.0