MikeLigalig.com

From FB of Arnel Cortez
DESIDERATA Binisaya
a birthday message to myself

Lakat nga malinawon taliwala sa kasamok ug kagahob,
Ug hinumdumi ang kalinaw diha sa kahilom.
Kon mahimo, sa walay pagtahan,
Tagda sa kaaghop, matag tawo'ng mailhan

Ipadayag ang matood nga tataw ug malinawon
Ug ang uban angay mong paminawon
Kay bisan ang mga uyamot ug walay hibangkaagan
Sila man adunay kasaysayan

Likayi ang banhaan ug mapangahason;
Sa kalag nagdala sila'g kahasol
Kung sa uban itandi mo ang imung kaugalingon
Mamahimo kang walay kapuslanan o kaha magul-anon
Sa kanunay dunay labaw ug ubos sa imung kaugalingon

Kahimut-i ang imung kalampusan ingon man ang imung mga laraw.
Sa imung natad, kadasig ipatigbabaw
Apan ayaw kalimti, Mapaubsanon;
Bahandi kini sa nagkabag-ong palad sa panahon

Pag-amping sa imung patigayon
Ang kalibutan puno sa mga malinglahon
Apan ayaw ka buta sa mga maayong gawi;
Daghan ang nagtinguha sa hataas nga mga mithi,
Sa bisan unsang kahimtang, tugob sa kabantog ang kinabuhi.

Pagmatinod-anon sa imung kaugalingon,
Labi na sa pagbati, ayaw pagpaka-aron ingnon
Ni ayaw katahapi ang gugmang bililhon;
Kay luyo sa kapait ug pakyas nga sugilanon
Susama sa sagbot, mosubing nga makanunayon.

Dawata nga mahinangpon ang tambag sa katuigan,
Ug itahan nga malinawon ang mga butang sa kabatan-onan
Alimahi ang kusog sa diwa batok sa kalit nga kaalaotan.
Apan ayaw katandog sa mga dautang handurawan.
Ang kahadlok mahimugso diha sa kabudlay ug kagul-anan.

Labaw sa mapiskay nga pagpanton, Pagmaaghop sa imung kaugalingon. Anak ka sa uniberso, dili uyamot sa mga kahoy ug bitoon.
May katungod kang mabuhing bililhon

Ug bisan kini kanimo dili tin-aw
Ang uniberso namiyous sama sa tanang mga adlaw
Nan pagmalinawon uban sa Ginoo nga nga kanimo tataw.

Bisan unsa man imung pagbudlay ug mga pangindahay,
Sa makalilibog nga kaguliyang sa kinabuhi, ug puno sa panghayhay
Hupti ang imung kalag sa kanunay.
Luyo sa mga limbong, palas-anon, ug pangandoyng napusgay,
Nagpabilin kining maanindot nga kalibutan.
Pagmaya. Pagmalipayon sa kanunay.

*WORK from HOME and START YOUR OWN blog site, business or personal website, or e-commerce store at www.dreamhost.com

Sitemap: https://tubagbohol.mikeligalig.com/index.php?action=sitemap

RSS Feeds: https://feeds.feedburner.com/tubagbohol

Tweets: https://twitter.com/tubagboholcom



Linkback: https://tubagbohol.mikeligalig.com/index.php?topic=104704.0