MikeLigalig.com

Mikagulgol ang pito sa guwardiya
Sa UST daw natuk-an
Pero unsaon pagdagan, girayuma
Ang tiil nga nalansang atubangan
Sa gipadlakan nga K-MAJ Restaurant.
Ang abog hugot nga migakos
Sa bulok sikwate niyang purol.
Ug mikubol ang iyang lapalapa
Nga nalanayan sa gihigop nga pulang tinta.
Apan nganong modagan? Iya nang gihuptan
Ang tulo ka sensilyo nga paglaom.
Iantog lang, iya nang masuta
Kon sama sa nagkapanas nga numero
Nagkahilis ba usab ang gambalay
Sa iyang kaugmaon.

bisayantek: have you ever found something you cannot explain yet still find it beautiful?

Dili nako ma explain imong balak, lawom tuhison, pero maanyag kaayo imong balaknong mga pulong...

kumpare nako ni si bisayantek, thyl.

mao diay maayo pud siya mo balak, Mike

Sakto ka, Thyl. Kasagaran magsugod ang akong balak sa mga nakita sa palibot ilabi na diha sa mga gagmayng butang nga wala hatagig bili sa kadaghanan.

Ang katahoman sa balak makita usab diha sa maayong pagkahan-ay nga mga pulong ug nahilahi sa kasagaran nga pagkasulti.

Bisan ako usahay dili sad makasabot sa gisulat kong balak. Pero ang mahinungdanong alang kanako nga gihatagan kog kagawasan ang akong kaugalingon nga ibungat ang pagbati nga kinasingkasing nga gihukad sa kahiladman.

Thyl, unsay epekto ning maong balak diha kanimo?

Bisyantek,

Dugay-dugay na ko nga wala maka du-aw sa balak portion tungod sa kadaghan sa akong tulomanon isip amahan. Napasmo, nangluspad ug niwang sa kagutom.

Busa mi hukad sa bahaw nga pan-os. Gi bahog ug gi higop apan natuk-an ang mga mata sa kamunggay nga mi pilit. Wala pa matagbaw, mi sawm sa kaldero nga gabukal ug gipangita ang langaw nga nalumos ug gipangutana.