UNOS
ni LETICIA U. SUAREZ
Cebu City
GIHUDLAT sa naglugitom nga hangin
Ang atop sa gamitoy kong balay
Gihiling sa kilat ang mga bintana
Ang nagdilaab nga tenidor sa langit
Nangitag makubit kong kabtangan
Gitamparos sa saputon nga kinaiyahan
Mga damgo kong mahayahay
Mitabikong sa akong mga bitiis ang baha
Nga espiso pa kay sa apdo ug panyawan
Lubog nga tubig, may bitbit nga laraw
Pagpakgang sa akong mga lakang
Unos ka man nga kanako mihamok karon
Mangtas ikaw nga dili kukhan, dili tang-an
Harungon ko ikaw sa akong mga hinagiban
Hugot na ang bakos sa kamatuoran
Ang pagka matarong nataod na
Isip salimbong ning guba kong dughan
Gisul-ob ko na ang sapatos
Nga modala kanako pagsangyaw
Sa balita sa kalinaw
Naa pa gyud koy taming sa pagtuo
Pun-an pa sa akong kalo sa kaluwasan
Ug sa espada sa Espirito
Unsa pa may akong kahadlukan
Ning hamok sa kinabuhi
Mawala man kining payag ko
Apan mahinanok ang kahiladman
Diha sa dughan
Sa akong Magbubuhat.
Gipatik sa mantalaang SuperBalita Cebu Pebrero 25, 2012.Linkback:
https://tubagbohol.mikeligalig.com/index.php?topic=47750.0