Panghupaw Ni Tikboy
ang adlaw milagiting sa kainit
sa udtong totok nga gihawanan sa panganod.
si tikboy sa kakapoy nagaping-it,
ang singot nagtulo sa panit niyang napagod.
ang kabaw nagaguyod sa balsahan
nga nagasubay sa gip-itong panginabuhi.
nagkalapok ang tiil sa umahan
nga nagtikad sa ugang yuta aron mabuhi.
ug miabot ang madanihong takna
sa iyang pagpahulay ilawom sa sagingan;
nabati ang tingog sa pagaw'ng trumpa,
nagpangagni og tapok sa tanan nga katawhan.
dool na man diay ang piniliay,
pagka-presidente, senador ug gobernador.
nanggingisi pa ang ilang panagway
gitabon sa buslotong bong-bong ug aparador.
kinsa na man kaha poy pilion ron?
naglumba pagpangambak ang ilang mga ngalan
sama sa nangahagbong mga dahon,
nagkaway-kaway, nitiurok sa handurawan
kaanindot kung mausab na kaha
ang hugaw nga pamaagi sa bugnong-lugaynon.
naglumba pagguwa ang mga luha
ni tikboy nga nagpanghupaw intawn sa kawad-on.
unsa na man poy mapaabot karon
human sa eleksyon ang mga saad mahanaw
ingon sila among dalan ayohon
kay ang libaong mura na'g tunaan sa kabaw
takna na man diay sa panihapon
murag gilaksi sa kagutom iyang tinai
Tok! tok! tok! Kinsa man ning misuroy 'ron?
Tikboy! Diay uwan-uwan! Palihog pangabli!
Linkback:
https://tubagbohol.mikeligalig.com/index.php?topic=18274.0