Ang Gidangatan Sa Mga Manoksinulat ni Michael LigaligAng kahumok ug kamadanihon sa imong kasing-kasing
nahulagway niadtong nanglugmaw nga mga luha
tungod sa pag-ihaw niadtong way alamag nga manok -
diin gikumot ang imong pagbati sa hilabihang kasubo
nga nahimong kasuko kay di ka buot ang ubang manok
makasaksi sa paglunggo sa liog sa ingon nga sama nila.
Gihilap ang imong kasing-kasing sa kahangawa
nga ang mga manok nga makasud-ong sa pag-ihaw
sa laing manok makuyapan unya o kaha malisoan
sa maayong pangisip o kaha malimot sila manok.
Mao nga miulbo ang imong kapungot batok sa way puangod
nga linalang nga buot mohunos sa kinabuhi sa manok.
Dili sa ingon nga dili ka mokaon ug fried chicken -
ang buot mo lang nga ipasabot ning kalibutan
nga usahay o kaha kanunay makalimot sa pagkaluoy
sa mga hayop - nga kung ila gyung tudason ang manok
di unta buhaton ni atubangan sa nalisang ubang manok.
Lalim ba mahimong manok? Dili. Padak-on, unya ihawon.
Kamoy manok lalim ba - seguro matod sa imong pangisip.
"Bisan kon ingon lang sila niana, hatagan unta pud nila
pagtahod ug bili ang huyang nga pagbati sa mga manok."
Diha sa imong kaguol, kalagot (gani buot mong piyongon
ang imong mga mata), miutong ang manok sa kataposan -
ug maoy magpabiling halandumon sa imong sugilanon
kadtong nasamaran, nagdugo maaghop mong kasing-kasing.
Linkback:
https://tubagbohol.mikeligalig.com/index.php?topic=8189.0