MikeLigalig.com

Ang Batang Nagkamoritsing
sinulat ni Mike Ligalig (circa 2009)

Kaganiha ang inahan nga dili mahitsura ang porma,
galago ang sinina, buhok gilawalawaan
sa aso ug abog, mibunlot sa kamot sa bata ug
mitiyabaw paghilak iyang anak. "bu**** ka,
wa kay hinungdan, lakaw, pagdali," singka sa
babaye, ug iyang gikumot ang ulo sa batang
nagkamoritsing kansang mga tiil daw agipo ug uling.

"Tabok, patyon ta kang buanga ka," kasuko sa inahan
nga natawo sa iyang kamot, unya diriyot maparok ang ulo
sa bata sa gahing kalsada tinumban sa mga dinagsa

"Ayaw iangin nang imong anak sa imong kabuang... ug wa na
kay gusto, ipasagop na sa DSWD, galuoyluoy lang ka
anang bata," sagbat sa tigulang babaye nanindag bisan-unsa
daplin sa kalsada gawas sa plaza - apan ang iyang mga pulong
giligsan sa tig-ang kasingkasing

Sa paglatas sa bata sa kalsada, gilabni ang iyang hilak
sa kalanrakas sa palibot, mga ligid ug makina nagtagawtaw
sa alas sayes sa hapon

Ang milanog nga kaguol sa batang gamay
karon gisalipdan sa hagulhol sa mga jeep,
gitabonan sa mga aso ug abog
nga misagol sa mga luha

Daghan ingon ana sa ato. Na unsa na kaha karon tawon ang bata? Nakakaon ba kaha?

bitaw gie,paluma panganak unya ina on ila anak.mayo wla nalang nila igawas.unya raba og madisgrasya dayong hilak patabang sa katawhan,sus majo jod pang latoson og alingatong nang mga nanay nga iresponsable ba.

Kasalbahis god niya nga pagkainahan,
Unta resulta na sa iyang binuhatan

Walay sala ang bata siya gipakatawo
Para lang mag-antus sa lamparo

Singhag ug langgis nga  balikas
Sa baba sa inahan way pagkupas

Agwanta  lang bata kay moabot ang adlaw
Ikaw mahimong dakong tawo

Imong inahan lamparoha
Bawos sa iyang pagkabergatinya