Ang babayng way bilbil
Ang babayng way bilbil kay morag baybay nga way kimba.
Morag sigay nga way bukobuko, tabugok nga way ata.
Sa bilbil mahibaw-an nganong bawron ang kadagatan,
Nganong gansang-gansangon ang mga batu sa hunasan.
Ang babayng way bilbil kay morag kawayang way buku.
Morag dapaw nga way katul, langub nga way tangu.
May misteryo ang bilbil nga susama sa misteryo sa lasang:
Engkanto sa pusod sa busay, minu sa pus-on sa pangpang.
Ang babayng way bilbil kay morag dan nga way kurbada,
Morag bungtod nga way subida, simbahan nga way kampana.
Ang babayng bilbilon morag sugilanong puno sa pasumbingay:
Sa gaawas-awas nga bilbil, may kaunlanan akong pauraray.
Tubag sa babayng naglikay ug bilbil
Baybayon nga may kimba, daghan ang nalumos bisan mabaw
Sigay gikulit ra sa panghupaw, ata makalagtong sa panan-aw.
Ang bawod sa dagat agi sa hunghong sa huyop sa hangin,
Batu sa hunasan bawod ray angay saligang mopabalhin.
Buku sa kawayan iyang kinaiyahan, ang bilbilon morag hantatawu
Samtang way bisan kinsa nga di mosalig sa langub nga way tangu.
Way misteryo ang bilbil tungod sa tambok nga wa maplastado
Abyan sa minu mapapas hinoon niini, apil pa ang mga engkanto.
Dalan nga way kurbada menos ug disgrasya sa laktod-laktod;
Bilbil subida nga sobrag bungtod, kampana nga gikawat sa lungsod.
Ang babayng bilbilon morag dumpol nga sugilanong gabitay:
Ang pagpauraray sa bilbil daw kapyot sa way haligi nga lantay.
Linkback:
https://tubagbohol.mikeligalig.com/index.php?topic=12880.0