sinulat ni Michael Ortega Ligalig
Usahay sa kinabuhi
dili ka makapili sa imong lingkoran.
Kung asa ang bakante, adto ka mopahiluna
ug dili igsapayan kung kinsa
ang anaa sa imong kiliran, likoran, atubangan - -
sama karon sulod sa 7-11 diin ang siopao
maoy misapnay sa imong kagutom,
ug ang bugnawng gininhawa sa aircon
mihupay gamay sa kalapoy sa lawas, ug
sa hunahuna nga walay pahulay
pangita, pagsuwat sa mga balita,
ug karon nga nasudlan na ang imong tiyan
buot kang mobasa sa Time magazine
nga imong gidala, usa nimo ka paagi
nga hinginlan ang kahapo sa hunahuna,
kaluya sa unod ug kabukogan
nga dili mahimong ikatulog samtang
nagsiga pa ang kalangitan.
Unya, anaa sa imong atubangan
ang upat ka mga linalang,
tingali mga dalaga nga mikalagiw
gikan sa kainit sa adlaw
sanglit ang ilang mga dila ug ngabil
naghapuhap man sa ice cream
kansang kabugnaw daw mibuhagay
sa malipayon nilang panagway - -
ug samtang ang katam-is milanay
dili mahikalimtan sa upat ang pagpahulagway
gamit ang dala nga cellphone, nagpulipuli
ug tuplok sila sa ilang gidalang kalingawan,
tingali sa dili madugay magbansiwag
sa tibuok kalibotan, hisgutan, lalisan
ang kalami sa ice cream, ikompara
sa ubang matang sa makaon,
ikompara ang ubang dapit nga naadtoan
hangtud mapupos ang daghang oras
sa gatosan nga katawhan nga magatuki
kabahin sa upat ka babaye nga nagmantala
sa sugilanon, kinabuhi sa ice cream...
apan sa gibitbit mong Time magazine,
kinsa ang magtuki sa sinuwat, estorya
ni Wendy Pearlman ug Loubna Mrie,
"The Agony of Syria"?
Get FREE 500GB online storage:
https://www.pcloud.com/welcome-to-pcloud/?discountcode=fDiE7jtC01VPbCIygaM67jZVLinkback:
https://tubagbohol.mikeligalig.com/index.php?topic=90617.0