Adlaw Sa Pagpilisinulat ni m. ortega ligalig
(in memory of a love story of a Tubag Bohol lady)
Lunhaw nga mga luha ang midahili sa imong aping
human ka makasulti asa ang pultahan sa kinabuhi
Lab-as nga mga luha ang miawas sa iyang mga mata
human siya makadungog sa kamingaw sa imong panagway
Ug diha sa tinagong kalibotan nga inyong gitindogan
milanog ang dahunog sa hagulhol sa inyong mga dughan
Nawatas-watas ang imong kasing-kasing sa imong hukom;
nahunlak ang iyang pagbati tungod sa dalang imong gipili
Usa ka tuig kang nagpaabot niining adlawa -
adlaw nga sudyaan ang kahilom sa inyong mga ngabil
Kini mao ang adlaw nga ang mga luha mao nay magtug-an
kung asa gitago ang paraiso nga giuhaw sa mga pangandoy
Linkback:
https://tubagbohol.mikeligalig.com/index.php?topic=7376.0