The Philippines > Philippine Archive

GO HERMIE Organic Vegetables Production Competition

(1/1)

MikeLigalig.com:
Cebuano News: DepEd padayong magpaluyo sa ‘GO HERMIE organic vegetables production’
by Pat Nano
OROQUIETA CITY, Misamis Occidental, January 8, 2012 -- Usa ka dakong tabang sa mga tunghaang misalmot sa GO HERMIE Organic Vegetables Production competition ang nasangpit nga programa sanglit napanahon usab kini nga ang mga tunghaan ang nangandam usab sa ilang mga ‘vegetables garden’ alang sa ‘Gulayan sa Paaralan competition.’

Ingon nga dakong tabang sanglit nahatagan sila sa pinansiyal nga ayuda alang sa pagpalambo pa sa ilang matag hardin ug mas nakadugang usab kini sa kadasig sa kabataan sa paghatag sa kamahinundanong pagpananom ug pagkaon sa bisan unsa nga mga utanon.

Kahinumduman nga niadtong milabayng bulan sa Abril 2011 gilusad ni Governor Hermie Ramiro ang GO HERMIE Organic Vegetables Production Competition nga adunay tulo ka mga kategoriya: household category, communal category ug school category nga diin gisalmotan sa mga tunghaan sa matag lungsod sa tibuok probinsya ug gipahigayon ang kahumanan niini niadtong milabayng bulan sa Disyembre sa samang tuig og ang nahimong mananaog mao ang Oroquieta City Central Elementary School.

Subay niini, mipadayag sa dakong kalipay si Edna Dumaog ang Education Program Supervisor sa Misamis Occidental Division ug mao usab gibutang nga Gulayan sa Paaralan Coordinator sa kaanindot sa programa ni Governor Ramiro nga nakatabang sa pagpalambo sa programa usab sa DepEd nga gulayan sa paaralan.

Sumala pa ni Dumaog nga mapasalamaton kaayo ang ilang buhatan sa kanunay nga suporta sa gobernadora sa ilang mga programa ug mapasaligon usab sila nga andam sila sa kanunay sa pagsuporta sa mga programa ni Governor Hermie Ramiro ilabina sa mga programa nga makahatag sa kaayuhan sa ilang kabataan.

Nasayran nga ang programa sa buhatan sa DepEd nga gulayan sa paaralan usa ka dakong tabang sa matag tunghaan sa ilang pagpahigayon nga ‘feeding program’ alang sa ilang mga tinun-an ug sanglit pinaagi niini nga programa nakunhuran ang malnutrisyon sa kabataan sa mga tunghaan sa tibuok probinsya. (PIO/PIA-10)

Linkback: https://tubagbohol.mikeligalig.com/index.php?topic=89943.0

Navigation

[0] Message Index