By Mike Ligalig
June 3, 2007
BANGKOK, THAILAND - Ang nahitabo ni Atty. Joe Torralba kapanaminan natong tanan, ilabi na gyud kadtong mga edad-edaran na nga angayan na mopahulay gikan sa politika ug motutok nalang sa paggahin ug panahon alang sa ilang mga apo.
Wala nalang unta mobalik si Joe sa natad sa politika, wa untay gasto ug wa untay hasol. Apan usahay ang mga butang kinahanglan nga magakahitabo aron mahimong kapanaminan sa kadaghanan.
Ang unang butang nga makapamalandong ta mao nga ang kinabuhi sama sa ligid sa bisekleta. Inig tuyok sa ligid, maibabaw, unya maubos.
Niadtong mga katuigan nga kada sangka nila ni Joe ug Atty. Dan Lim, sige kabulintang si Dan Lim, ug si Joe ang kanunay nga mogawas nga mananaog matag bugtong lugaynon, dili pud lalim ang gibati ni Dan sa dihang nahimo siyang kataw-anan, ug usahay nahimong somsoman sa mga umay-umay ug biay-biay.
Nakadungog ta sa estorya ni Joe sauna nga moingon dayon siya: “Ah, sige, naman na langsad, wa may daug-daug… luoy, luoy.†Siguro giantos lang ni Dan Lim ang maong masakit nga mga pulong.
Lisud man gud ning naa ta sa taas ug unya atong yam-iran ang naa sa ubos. Si Dan Lim niadtong higayona nahimong piso nga naghangad sa karaang hinuktan nga kusog kaayo motoktogaok, dalang kakha-kakha, aron ipakita ang iyang pagkahawod.
Ug lagi sa kinabuhi, kasagaran, ang taas ug tahod bun-on man sa sunoy, kay ang dag-anan sa karaan mao man lang ang tiningob nga hunat inig syapol, apan kon dili makakupog, maluya naman dayon kay lagi dali namang hangakon.
Dili pareha sa sunoy nga inig buhi sa arena, human sa makabungog nga kasaba sa sultada, asdang dayon, syapol taman-taman. Bisag dili katunong ug tira, kumos lang gihapon, kupog-kupog, bahalag magkamoritsing – basta makasyapol lang. Ug ang sunoy dili dali maluya kay lig-on pa man lagi ug tuhod. Ang bantayanan lang sa sunoy kay kung makahawid ang tadhan, pang-one-time gyud ang bunal ana – kanang bunal nga wa nay balikay, way pamilokay.
Ug si Dan Lim nahimong sunoy sa tuig 2004 nga syapol bisan asa, nga modeskorso bisan sa FM Radio Station.
Ang mga tawo nga nagsud-ong sa kandidatora ni Dan Lim niadtong 2004 didto modapig sa “inilog†kay “biya†man lagi ang sunoy.
Apan diha diay mga nagpahiping katawhan nga nagtuo nga aduna ray paglaum ang sunoy sa iyang mga paningkamot ug pangindahay.
Niadtong maong sultada, nagkabalhibo ang mga Torralba nga naigo sa butse-butse tungod sa syapol ni Dan Lim.
Miabot ang tuig 2007, human naalim ang samad sa tari, mibalik sa sultada ang Torralba, ug sa susamang higayon, daghan usab ang nagtuo nga ang hinuktan nga gibuno na, makabawi ra gihapon – sambahan diay ug makataop ang tari sa liog.
Dihay tambag nga akong nadungog sa mga sabongero sauna. “Ajaw na lagi ibuwang na kay gibuno na nang manoka.†“Dimalas nang gibuno kung itari pag-usab.†Mao niy sulti sa mga gilomotan na sa bulangan.
Duna baya poy unod ang ilang gisulti. Ingon sa akong Papa sauna nga ang manok nga gibuno apan wala maihaw, buhian nalang aron mangopa sa mga himongaan, ijawat makaliwat gihapon. Ingon pud sa akong Papa nga ang gibuno na nga manok dili pud angayan ihawon kay gahi na ug karne.
Wa ta masayod kon unsa gyoy angayan nga buhaton sa gibuno na nga manok. Dili pud angay nga paligsan nalang sa kalsada ang manok kay luoy, luoy, luoy.
Mao lagi sa kinabuhi: adunay sinugdanan, adunay kataposan. Maibabaw ta, usahay maubos ta. Dili imo ang tanang higayon.
Dili sab ensakto nga kung imo karon, ugma imo lang gihapon.
Tanan adunay kinutoban. Si Joe Torralba ug Dan Lim: usa ra: aduna ray kinutoban.
Linkback:
https://tubagbohol.mikeligalig.com/index.php?topic=544.0