By Rey Anthony Chiu
PIA - Bohol
Sa mga interesado nga mananum og jatropha curcas o tubatuba, ang mga lugar nga danawan o masanapan sa tubig dili angay tamnan niini.
Dugang pa, ang tamnan kinahanglan dili acidic o kadto lamang nga yuta nga ubos sa 9.0 ph ang ka-aslom aron motubo og maayo ang tubatuba.
Kini maoy sugyot sa International Cops Institute for Semi Arid Tropics (ICRISAT) nga nagbase sa India.
Ang sugyot mitumaw human gitun-an ang potensyal sa tubatuba isip tinubdan sa bio-diesel.
Ang Jatropha curcas o tuba-tuba molungtad sa huwaw ug may taas nga non-edible oil content nga sa Pilipinas, kasagaran gigamit lamang isip utlanan sa mga kayutaang pribado.
Sa nagsulbong nga presyo sa lana, milutaw ang tuba-tuba isip maayong tinubdan sa bio-diesel, ug matud pa, gawas sa maayo kini alang sa kalikopan, mahimo pa kini nga kapanginabuhian sa mga katawhan.
Matud sa ICRISAT, ang mga tubatuba nga itanum sa mga yuta nga danawon ug tubigon mahimong tinubdan sa sakit sa tanum hinungdan nga kini malawos ug mamatay.
Apan bisan pa sa kasikat sa tubatuba, misugyot usab ang ICRISAT nga kadto lamang mga yuta nga dili na kahimuslan sa panguma ang himoong plantasyon sa jatropha.
Matud sa pagtuon, ang tamnanan sa tuba-tuba kinahanglan usab may dyutay nga pag-atiman ilabi na sa tubig og sa pagseguro nga dili kini dali nga mabanlas sa uwan.
Linkback:
https://tubagbohol.mikeligalig.com/index.php?topic=8955.0
