CEBU, Philippines - Gidala na sa usa ka pribadong tambalanan dinhi sa Sugbu ang batang babayeng gipanganak nga ang kasing-kasing naa sa gawas sa iyang dughan kagahapon sa kaadlawon.
Si Delia Etcuban, apohan sa batang ilang gipanganlan og Niña Mary sa pakighinabi sa Banat News sa telepono nagkanayon nga gidala niya ang apo aron mapatan-aw ug matabangan sa kahimtang niini dihang nakasinati kini og pag-ubo. Ang bata gipakatawo sa 27-anyos niining inahan nga si Sweetsie Etcuban Magdadaro nga taga sitio Das sa barangay Bitoon lungsod sa Daanbantayan niadtong Sabado sa kaadlawon diha ra sa ilang balay.
Matud pa sa apohan kinahanglan maoperahan ang bata aron iuli sa sulod ang kasing-kasing niini, apan siya midugang nga base sa pasiunang pagtan-aw sa espesyalista kagahapon nga gamay ra kaayo ang bakanteng espasyo sa ilawom sa dughan sa bata nga kasudlan sa kasing-kasing.
Gikatahong nagplano ang mga doktor nga kini operahan apan di ipasulod kundili tabunan ra kini aron di mag-uga ug aron usab malikay sa impeksyon.
Ang bata kasamtangang gibutangan og oxygen aron matabangan sa pagginhawa samtang gibutangan na og antibiotics kontra impeksyon tungod sa kahimtang niini. Kun mahinayon ang operasyon karong adlawa nagkinahanglan ang pamilya og P10 mil nga down payment ug dugo nga ‘B plus.’
Usa sa mga doktor sa maong tambalanan nga nagdumili sa pagpahingalan mibutyag sa Banat News nga ang maong balatian gitawag og thoracic ectopia cordis, usa ka talagsaong sakit tungod kay 7.9 sa matag usa ka milyon ka tawo ra maoy mataptan niini. Matud pa niya anaa sa average nga timbang sa batang Pilipinong puya ang gibug-aton sa bata, ang average nga timbang sa mga bata bag-ong gipanganak tulo ka kilo.
Sumala pa niini nga operasyon ra maoy makatabang sa bata apan nagkinahanglan og dakong salapi alang sa procedure. Giangkon usab niyang tungod sa katalagsaon niining maong balatian wala pay ‘standard procedure’ nga matamdan ang mga doktor.
Si Dr. Peter Mancao, usa sa mga espesyalistang heart surgeon dihang gikuhaan sa Banat News og opinyon mibutyag nga kinahanglang maoperahan ang bata tungod kay peligro kini sa impeksyon ug mag-uga ang kasing-kasing.
“Iuli (heart) sa sulod kay nasirad-an man ang cavity, ato nang ablihan ug ihulog og balik,†matud pa niya. Kabahin sa problemang gamay ra ang espasyo diha sa ilawom aron mopaigo ang kasing-kasing, si Mancao nagkanayon nga mo-adjust og iyaha ang baga sa tawo ug kini maoy mohatag og lugar sa kasing-kasing.
Sumala pa ni Mancao nga nakasugat na sila kaniadto og susamang kaso didto sa Philippine Heart Center ug nabuhi ang bata, ang kalainan lang mao nga ang katunga ra sa kasing-kasing ang migimaw sa dughan. Si Daanbantayan Mayor Sun Shimura nagkanayon sa Banat News, kagahapon palang siya nakadawat sa maong report ug mipasalig nga mopadala og tawo karong adlaw sa tambalanan aron mosusi sa gikinahanglang hinabang pinansyal sa bata. -
Linkback:
https://tubagbohol.mikeligalig.com/index.php?topic=23631.0
