CEBU, Philippines - Duha ka lalaki ang nangalandig sa tambalanan human nagtinigbasay ug nagtargetanay og sundang ug kutsilyo, usa kanila kritikal kagahapon sa buntag sa sitio Tigib, barangay Lagtang dakbayan sa Talisay.
Ang mga nalandig sa tambalanan giila sa mga polis nga si Gary Zamora, 31-anyos, drayber sa habal-habal ug ang ama-ama niining si Tony Manuel Degamo, 38, parehong mga residente sa nahisgutang lugar.
Si Gary ang nakaangkon og samad tinigbasan sa agtang, walang bahin sa liog ug ang tuong kamot niini ang diriyot maputol ug kritikal ang kahimtang niini.
Samtang si Degamo ang nakaangkon og samad ubos sa walang suso human ang kutsilyong gi-target ngadto kaniya kang Gary mitaroy.
Ang duha daling gidala sa mga polis pinanguluhan ni PO3 Arnold Damasco ngadto sa Talisay City District Hospital apan tungod sa ilang kahimtang gibalhin ngadto sa Vicente Sotto Memorial Medical Center.
Si Espina nga nahinabi sa Banat News mibutyag magpangayoan og kwarta si Gary sa igsuon niining babaye nga may uyab nga langyaw apan gumikan kay wala mosugot si Degamo nga hatagan kini og salapi nagkaaway ang duha.
Si Gary mipauli ug mibalik nga nagbitbit og sundang nga mubo ug kutsilyo apan dihang migawas si Degamo nga may dalang mas taas nga sundang gi-target nalang kini ni Gary diha sa dughan.
Bisan samdan si Degamo naapsan niini si Gary nga nadagma ug diha-diha gitigbas kini makadaghang higayon. (Brenda Batuto) . (BANATNEWS)
Linkback:
https://tubagbohol.mikeligalig.com/index.php?topic=22746.0
