MikeLigalig.com

Pagdapat sa imong mga lapa-lapa sa pantalan sa Tagbilaran, naglumba pagdagan ang nagkadaiyang sugilanon ug kagahapon aron mohangop sa imong paghiabot.

Kadaghanan sa imong mga higala wala masayod sa imong paghidangat karon. Gawas kang Atty. Aleckoy Lim nga nag-monitor kung asa ka na gikan sa airport sa Bangkok ngadto sa NAIA ngadto sa Mactan Airport, walay nahibalo sa adlaw sa imong pagbisita sa dakbayan ug probinsya nga imong gihandom ug gikamingawan.

Nagtindog ka sa hawanan sa pantalan nga jogging-nganan ni Chito Fuentes ug sa iyang asawa nga si Chinky ug imong nalantaw ang opisina ni Raul Oblenda, ang manager sa PPA Tagbilaran. Imong gianinaw ang kalikopan. Imong nalantawan ang Bohol Tropics sa unahan ug nahinumdum ka sa mga botelya sa red wine nga natumba didto ug nadungog mo pag-usab ang kinantahan ni Ric Obedencio ug Dandan Bantugan usa niana ka gabii sa panagtapok sa mga kaubanan sa media sa Bohol.

Wa ka masayod sa imong sunod buhaton. Molakaw lang ba. Magpara ug traysikol. O kaha mohanggap lang sa lab-as nga hangin gikan sa Panglao ug Dauis. Sa pagkakita mo sa isla sa Panglao, nahulagway mo ang resort ni Kagawad Nila Montero, ang dinaug-daug nga resort ni Mayor Doloreich Dumaluan, ug nahinumdum ka sa kaanyag sa Bohol Beach Club.

Nakahukom ka nga mosakay nalang ug traysikol. “Pilay imong hatag”? sukna sa drayber. Kadaghan na ka makabati sa maong pangutana. Mahigalaon gihapon ang mga drayber sa traysikol sa Tagbilaran - pero usahay uban kanila mga balasobas ug kinaiya – apan dili pareha kamangtas sa mga taxi driver sa Manila.

Wa ka masayod asa matulog karong gabhiona. Wala na kay madulngan nga pinuy-anan. Ang imong gisak-an sa Dampas lain na ang nagpuyo. Ang imong mga ginikanan ug igsuon tua sa Anda. Kung didto ka magpalabay sa kagabhion sa balay ni Stephen ug Janice Cagulada sa Tiptip, layo na pud kaayo sakyon.

Nakadawat ka ug text sa imong higala. “Dretso diri sa balay.” “F. Rocha Extension ko bai,” matod mo sa drayber sa traysikol.

Daghan ka ug nalabyan nga mga balay patigayon ug nagkadaiyang edipesyo. Nalabyan mo ang DYTR ug nahinumdum ka ni Manny Sales, Dodong Libatona, Lito Responte, Mirabel Gementiza Matig-a, ug Wing Bullecer.

Unya, nalabyan mo ang Brewpoint – ang paboritong lugar ni Chito Visarra ug Bachoy Alba – ang dapit diin didto mo magkukabildo ni Bobby Cericos, Nilo Sarigumba, o kaha Ricardo Lim – diin usahay makatulog nalang ka ug binasa ug libro didto.

Pag-abot mo sa balay ni Atty. Aleckoy Lim, giabi-abi ka ni Atty. Koykoy Lim ug ni Kit, duha ka anak lalaki ni Atty. Lim. Gihimamat ka sa asawa ni Atty. Aleckoy Lim nga si Elsie Lim ug igsuon nga si Atty. Myrna Pagsubiron. Apan wala mo makita si Atty. Alissa Lim, anak babaye ni Aleckoy.

Daghang mga tawo imong nakit-an nga wala ka nakaila. Nakurat ka sa dihang gisangpit ang imong ngalan ni Priscilla Richards, ang columnist sa Bohol Standard. Daghan siyang gisugid nimo nga mga estorya mahitungod sa Bohol ug Tagbilaran ug nalingaw ka naminaw sa iyang mga estorya.

Paghuman ug panihapon, gihatod ka ni Aleckoy sa lugar diin didto ka magpuyo samtang nia ka sa Bohol. Samtang nagdagan ang sakyanan, nakapangutana ka ngano man gyud nga ang anak ni Eladio Jala mao man ang iyang gitukmod sa pagdagan ug congressman. “Kahakog ba kini sa gahom?” nakapangutana ka. “Mga ilaronon ba ang mga Bol-anon nga mopili lang ug congressman tungod sa ngalan sa amahan”? dason mo ug sukna.

“Kinsa may kusog diri sa Tagbilaran”? palain mo sa pangutana. “Naay moingon nga si Dan Lim, nay moingon si Joe: depende lang kinsay pasultion,” matod sa imong amigo.

Dugay ka natulog kay nag-update ka sa imong news blog (www.onlyinphilippines.blogspot.com) ug nagpanday sa imong website (www.mikeligalig.com).

Pagkabuntag, nakahukom ka moadto sa imong gipuy-an kaniadto. Imong gisuta kung duna ka pa bay mga sinina nga isul-ob kay wa kay jamong gidalang sapot gikan sa Thailand. Didto sa maong balay, imong napalgan ang daghang balak nga imong gisulat kaniadto. Nagplano ka imong e-post kini sa friendster.com.

Nag-abot ang imong pamahaw ug paniudto didto sa tapsilogan dapit atbang sa provincial hospital. Magsige ka ug palabay ug oras ning maong dapit nga magbasa ug Time magazine. Gimingaw ka sa maong lugar.

Pagkahuman ug kaon, namaklay lang ka paingon sa Metro Centre. Namalit ka ug grocery sa Sundry alang sa usa ka semana nimong pagpuyo sa Bohol. Unya, miadto ka sa hotel lobby diin sige ka makatulog nga magbasa ug novel. Nag-order ka ug fresh buko. Pagkahuman, miadto ka sa Chez Andre (daw kaluha sa Jojie’s Bakeshop) ug gibilin nimo ang imong laptop. Didto sa BQ, namalit ka ug medyas kay wa kay medyas dala.

Mipalit ka ug Bisaya magazine sa tindahan tapad sa Jojie’s Bakeshop kansang mga tag-iya nga si Arnold Labunog ug Jojie Labunog imong igsuon sa pagtuo. Unya mipalit ka ug banana cake sa Jojie’s Bakeshop, ang imong kinaham.

Ang talithi sa ulan daw naggukod nimo samtang milatas ka sa CPG Avenue; nanubay ka sa daw makalilisang nga Agora Building, ang hulagway sa damgong napusgay. Nakapanampong ka sa imong ilong paglabay sa Agora tungod sa kabaho sa anso. Nahadlok ka ang mga tawo mangasakit tungod sa kabaho sa ihi sa palibot.

Milabay ka sa Alturas ug imong nakita ang nagponsisok nga katawhan sama sa kadaghan sa Bohol Quality.

Sa pagtungod nimo sa building sa DYRD ug Bohol Chronicle, mihunong ka ug lakaw ug nakahuna-huna nga mohapit ug dili na magpaabot ug bisita sa sunod semana.

Halos tua sila tanan didto ang imong kanhi mga kauban sa buhat. Ug naghinangupay mong tanan. Si Bong Recimilla nakurat sa imong pagbutho. Si Ihid, ihid ra gihapon, apan nag-antiyohos na. Si Ali Amoguis, Ali ra gihapon. Si Fe Moncada, tam-is gihapon ug pahiyom. Si Iching Maestrado, sige lang gihapon ug ngisi ug pasiaw. Si Maricel Galero, wa gihapon magpakasal ni Robert. Wala si Sir Peter Dejaresco sa imong pagdalikyat didto.

Taud-taud, niabot si Glenn Lumantao gikan sa Buenavista. Naghinangupay mo sa imong higala nga maoy usahay mohatod nimo ug pauli kung mag-abot mo ug tukaw sa trabaho sa Bohol Chronicle kaniadto.

“Sige, basin naa ko sa Brewpoint karong tungang gabii inig human nako ug sulat,” gisultian nimo si Glenn. Unya miabot si Boyet Requeron ug Ven Arigo, unya si Paul Vistal. Ug gisultian ka ni Ven ug Boyet sa mga politkanhong katikaran sa Tagbilaran. Unya nagplano ka nga pakigkitaan si Fred Amora ug iyang anak nga si Jun Amora, layout artist sa Bohol Standard.

Dihay kahilom. Nagtindog ka sa B. Inting Street ug namalandong: “Unsa kahay kaugmaon sa Tagbilaran kung ituboy pag-usab si Joe pagka-mayor.” Nakapanglingo-lingo ka sa imong ulo.

---------
Published in the Bohol Standard on 04/15/2007
written by www.mikeligalig.com

Linkback: https://tubagbohol.mikeligalig.com/index.php?topic=162.0