MikeLigalig.com

Gisugyot nga balaodnon gigawas sa Malacañang

Gipagawas ni Presidential Legislative Liaison Office (PLLO) Secretary Adelino Baguio Sitoy karong adlawa ang mga gisugyot nga mga balaodnon alang sa administrasyon ni Presidente Rodrigo Duterte.

Gibalita ni Sitoy atol sa usa ka press briefing ang resulta sa nahitabo nga cabinet meeting kaniadtong Myerkules diin gipresenta sa Department of Finance (DOF), Department of Budget and Management (DBM), ug Department of National Defense (DND) ang ilang mga sigugyot nga balaodnon.

Girekomenda sa DOF ang pagkunhod sa personal ug corporate tax, buhis sa gasolina, sugary products ingon man ang pag-amendar sa Sin Tax Bill.

Samtang, gisugyot sa DBM ang rightsizing sa burukrasya ug sa paglalang sa Department of Housing and Urban Development.

Girekomenda sab sa DND ang pag-amendar sa National Defense Act alang sa pagbuhi sa Reserve Officers’ Training Corps (ROTC).

Lakip sab sa listahan ang pag-amendar sa mga gisaad ni Presidente Duterte atol sa iyang State of the Nation Address (SONA) kaniadtong Hulyo sama sa anti-terrorism law, anti-money laundering act, anti-cybercrime act, whistleblowers' act, creation of OFW department, BBL, ug Counter-terrorism Act.

Miingon sab si Sitoy nga ang miting sa Legislative Executive Development Advisory Council (LEDAC) kay regular nga ipahigayon nga apilan ni Presidente Duterte isip Chairman, Leni Robredo isip Vice Chairman, Senate President Koko Pimentel, House Speaker Pantaleon Alvarez, ug pito ka mga sakop sa kabinete

Maapil sab sa LEDAC ang tulo sa mga miyembro sa senado diin nominado silang Fraklin Drilon, Ralph Recto, ug Vicente Sotto III ug tulo ka sakop sa House of Representatives ingon nominado si Rodolfo Fariñas, Danilo Suarez, ug Dakila Cua.

Linkback: https://tubagbohol.mikeligalig.com/index.php?topic=82796.0