"oissst wa man lagi kanta ni nga storya....hehehe demanding na ang odgens hahahaha."
wa jud ko kadumdum atong kantaha bitaw. mao nga, wa sa lang nako butangi og awit.
jamo2x, salamat sa imong paambit. nagkatawa ko nagbasa samtang nag-handuraw sad sa maong hitabo. kalami kaha sa pamati nimo nga nahimo kang iyang superhero. tabi, buhi pa tong iyang hinatag nga t-shirt nimo?
wa jud to kalimot nimo; sayang lang nga wa na kamo magkasinukliay og sulat.
apan kining akong ikaasoy karon lahi na sab kini nga babaye. ako ni siyang nahimamat sa cavite. grupo kami atong naglaag dapit sa usa ka lugar. syempre, daghang lingaw-lingaw nga mahitabo. duwa og baraha; inum; chika-chika; ug kanta-kanta. usa ka gabii, nagdula mi og "truth and consequence". tupad ako og lingkod sa usa kauban sa among panaw atong tungura. kyutan jud kos iyang porma. may pagka-unuron. ambot, madani kog mga medyo undanon og panglawas. kini tingaling, niwang ta. hahaha. para nako, usa siya ka maanyag nga babaye.
sa ako nay natunong og truth and consequence, ila kong gipangutana, "kinsa may imong crush dinhi?" hmmmm, way duha-duha, gitudlo nako siya nga naglinkod sa akong tupad--humot ra ba kaayo iyang pahumot. wa lang ako adto magpakabana. ako lang, duwa ra man.
apan, naunsa ba, mura man kog "gimingaw" samtang nag-iya-iya na mig sulod sa maong mga kwarto para mangatulog. "tsk tsk tsk," ingon kos akong kaugalingon, "patay, mura na man kog nadutlan og sugod." niabot ang kabuntagon, wa gyud to mawala sa akong hunahuna ug kasingkasing; abi man nako og mahanaw ra kadto uban sa paglayas sa kagabhi-on. apan, wa oy. peste! apan kining nakapanaad ta human sa pipila ka masakit nga kasinatian sa gugma, nga dili na mahigugma sa pag usab, mao nga akong gipakli og balik akong kasingkasing; gitipigan ko kini sa sook sa akong dughan. gitrankahan. gipalong ang suga sa paglaum aron di na kini mosilaob sama sa kalayo nga mitakboy sa ugang sagbot. masaligon si Adan nga di na mosupak sa iyang panaad nga dili una moingkib sa mansanas sa gugma. dili karon! huh, dili karon! as in, karon!
nipauli na kami. sakay sa sakyanang pang-publiko. hoot sa sulod kay daghang tawo; gipalingkod namo ang among mga kaubang babaye; kini lagi konong "gentleman" ta. bujag! usapa! pero, agwanta bisag kagurog nag tuhod kay huwoy og tinindog. tood man, hapit na kami moabot sa among abutanan, diha'y bakanteng lingkuranan sa iyang tupad. Kris iyang pangalan. ug si Kris misinyas kanako sa pagbalhin--TUPAD niya! wa pa to nako baliha, apan, sa kahuwoy sa akong tiil, nidool ko ug milingkod. sa IYANG tupad. wa gihapon ko manumbaling. hangtud...
nagtakdo sa makadaghan ang among mga siko ug braso, kay tupad gud. ug siguro tungod sa kalayo sa byahe, gikapoy si Kris. dayon, midungoy iyang ulo kay katulgon. busa ako siyang gipapaurayray sa akong abaga. ug mihop ang iyang humot nga ulo sa medyo bukogon kong abaga. gapiyong iyang mga mata. pero, wa gud matog. kay sa paggunit nako sa iyang kamot, migunit man pod og bawos. giatay na! hahahaha.
gagunitay mis among mga kamot--hugot, may malisya (sa akong bahin, ug iya pod tingali hehehe), may pagbati, may kainit, may kahulugan, may mga pangutana--hangtud miabot kami sa among abutanan. ug ang naggunitay nga mga kamot, nagbuwag ug mikawayway aron mag-iyahay na pagpadulong sa among tagsa-tagsa ka pinuy-anan. apan ang akong kamot nagbitbit nas iyang cell number...kay naa na diay plano.
human milabay ang pipila ka adlaw (gipalabay pa jud og pila ka adlaw!), nag-atubang kos telepono sa balay, gagunit sa numero ni Kris. pindot sa usa ka numero..dayon, cancel. pindot na sad, karon, duha na ka numero...nya, cancel.
...ug niusab og pindot, una, ika-duha, ika-tulo, ika-upat nga numero ug nagsunod-sunod og pindot sa ubang numbero, ug human, mibagting ang telepono sa pikas..."Hello" Si Kris! ug nagsugod ang pagbati sa pagtubo gawas sa nahikatulog nga dughan. human sa pipila sa yugto sa pagkighinabi, nangutana ko, "pwede ka maimbitar og date?" ug nadungog ko ang nindot nga tubag, "pwede. asa man ta?"....
kada kadungog nako aning kantaha, makahinumdum ko niya mga mikiaykiay sunod sa katulin sa maong awit...labi nag makadlawon, kung makabati ko ani..mura og kumuton akong dughan...
http://www.youtube.com/watch?v=S6xM5QXZCEEkining nawong sa video (di ko manghambog), dili na ako. hahahaha
Linkback:
https://tubagbohol.mikeligalig.com/index.php?topic=18186.0