MikeLigalig.com

Bay,

Ang takna alas 5:55 sa hapon. Mao'y pagsulod nako sa Islang City Mall. Pastilan, Bay, hilabihang gubota sa sulod. Nagbanaw ang mga tawo. Diha'y mga tawong padulong gawas, nakigsugat sa mga tawong padulong sa sulod. Diha'y naglaray sa counter aron mobayad alang sa ilang gipamalit. Diha'y nagtan-aw-tan-aw sa mga bag-ong casing sa cell phone. Diha'y mga estudyante nga nagpas-an pa sa ilang mga bag, o kaha nagbitbit sa ilahang mga libro. Diha'y mga empleyado nga nangukay sa maayong pagkapilo ug pagkahapnig nga t-shirt nga gitapok ibabaw sa dakong lamesa ug ubos sa dakong sign nga nag-ingon, "50% Off!" Diha sa'y mga empleyado sa ICM nga nagkara-kara pagpamilo sa mga gibungkag nga mga baligya.

Nanggitik sa tiil ang awit nga "Angelina" nga gipatugtog sa sound system. Ug kalit lang mibagting ang kampana sa maong sound system ug diha'y tingog gikan sa langit nga miingon, "The angel of the Lord declared unto Mary..."

Takna na diay's Angelus, Bay. Pastilan, bisan wala'y nagsugo, mihunong sa bisan unsa nilang gipamuhat ang tanang tawo sulod sa ICM. Diha'y uban nga nanguros og dinagko. Diha'y uban nga nanguros og ginagmay (kana ganing panguros nga himoon ra sa imong nawong, pakapin hawok sa mga tudlo inig amen). Diha'y uban nga miduko aron mag-ampo. Diha'y mga naglakaw nga mihunong sa ilang mga lakang ug gilibot og tan-aw ang palibot. Diha'y mga nag-estorya ganina sa dagkong tingog apan sa dihang mibagting na ang kampana, mipahinay sa ilang mga tingog ngadto sa hunghong.

Wala'y nagsugo ani nila paghunong sa tanan nilang gipamuhat takna sa Angelus, Bay. Ma-Kristiyano man o dili, ma-Katoliko man o dili, mihunong silang tanan. Usa kini ka dalaygon nga batasan tungod kay nagpadayag kini sa atong lawom nga panginahanglan sa pag-ampo ug pakighiusa nianang Makagagahum bisan og pipila ka gutlo lamang matag adlaw, bisan og sa takna lamang sa Angelus. Apan ayaw sab kalimti, nga anaa'y mga tigpakaaron-ingnon nga mihunong sab dili aron mag-ampo kondili tungod kay maikog lamang sila nga ang kadaghanan mihunong.

Ang tibuok adlaw sa matag BOHOLANO napuno sa nagkalainlaing buluhaton. Apan pipila lamang sa baynte-kwatro ka oras sa usa ka adlaw ang igahin nato aron makighiusa sa atong Makagagahum diha sa buluhaton nga gitawag nato'g pag-ampo? Pila ra man kanato ang makahinumdum pagpasalamat sa Makagagahum? Pastilan, Bay, moyahat ra man ta sa langit kon may kinahanglanon na kita. Motak-op ra man ta's atong mga palad panahon sa katalagman. Moluhod ra man ta panahon sa tumang kasakit ug pag-antus nga gi-uhaw sa kahupayan. Dili man lamang gani ta malipay ug magpasalamat nga matag buntag mobuka pa ang atong mga mata ug nagginhawa pa kita.

Mao tingali'ng gubot ang dakbayan nato, Bay, tungod kay nakalimot na kita pagtan-aw sa mga angay'ng ipasalamat. Kung buot gyud hunahunaon, mas daghan ang angay natong ipasalamat kay sa ipangayo. Itala ra gud karon dayon, Bay, ang mga butang sa imong kinabuhi nga angay nimo ipasalamat.

Ayaw pagpaabot sa takna sa Angelus, Bay, aron ka makapasalamat sa Makagagahum. Matag segundo sa imong adlaw, kanunay pagpasalamat. Himoa ang imong kinabuhi nga usa ka kinabuhi sa pagpasalamat. Na, kung mao ni imong buhaton, sigurado gyud ko nga may dakong kausabang mahitabo sa imong kinabuhi. Kung mao ni ang buhaton natong tanan dinhi sa dakbayan, pastilan, mas hapsay pa kining dakbayana kay sa buhok sa akong lolo nga gihiso-an og sabila. Pastilan gyud, Bay, ang tawong mapasalamaton ra ang kamaong mongisi sa isigkatawo. Ang tawong mapasalamaton ra ang kamao makighuy-huy sa isigkaingon. Mao bitaw nga mitoo gyud ako nga ang kalinaw ug ang pagpasalamat dili managlayo sa usa'g usa.

Gikan sa pagsubang sa adlaw inig buntag, hangtud inig salop niini inig kilum-kilom, padayon sa pagpasalamat sa Makagagahum. Ug kon makalimot ka pagpasalamat, dayon sa Island City Mall sa dili pa mobagting ang kampana sa alas says, aron mapahinumduman ka. Ayaw'g kaikog, Bay. Buhi ka nianang taknaa, ug angay kana ipasalamat.

Ang imong higala.
barbaro

Linkback: https://tubagbohol.mikeligalig.com/index.php?topic=1291.0

This was also done in NCCC Mall and SM Davao when I was there for vacation, I really appreciated these shopping malls for reminding us the Angelus prayer, the mystery of great love of God that He gave His only Son who saved the world by dying in the cross.

Luyo sa atong mga gimbuhaton mamalandong makadiyot aron pag ampo sa Labawng Makagagahum paghatag ug dakong pagpasalamat Kaniya.   



Linkback: https://tubagbohol.mikeligalig.com/index.php?topic=1291.0

morag wa bitaw angelus sa manila malls

Linkback: https://tubagbohol.mikeligalig.com/index.php?topic=1291.0