written by M. Ligalig
Nakalimtan ko na ang kahapdos sa imong pagbiya,
nalubong na sa kalimot kadtong kangul-ngol
sa samad nga migisi sa mga ugat ning kasing-kasing
Dili na ako mahinumdum sa kuko sa kadlawon
nga mikamras sa akong lapa-lapa dihang nanamilit
ka kanako
Wala ko na mahanduraw ang kasakit sa kabukogan
dihang midat-og kanako ang kalibutan
sulod sa tulo ka adlaw ug gabii, diin giantos
ko paglad-ok ang pait nga mga luha, mga luha
nga gisangag sa pagsalimuang - daw tawong bu**** -
gimino diha sa mga eskina sa damgong napusgay!
Linkback:
https://tubagbohol.mikeligalig.com/index.php?topic=12.0