Ni JEEPY P. COMPIO
MITUSKIG na nga nagbitay ug wa nay kinabuhi ang usa ka pintor human maghikog kay miuban ang iyang asawa sa laing lalaki.
Alas 3:45 sa hapon niadtong Biyernes nakit-ang nagbitay na lang ang biktima nga si Joman Michael Sayman Ramos, 24, didto sa ilang balay sa Zulfur Street, Morning Side Heights, Ramos Compound, Buhangin District.
Base sa inisyal nga imbestigasyon ni Senior Police Officer 4 Aaron Robles sa Buhangin Police Station, nasayran nga usa ka Reynaldo dela Fuentes Ramos ang miadto sa balay sa biktima ug iyang nakita nga nabitay na ug wa nay kinabuhi ang pintor.
Dunay samad inagian sa hinigtan sa nylon rope ang liog sa biktima nga iyang gikutay sa kahoy ug nagpabitay kini.
Ang kapulisan nakarekober og usa ka suicide note diin nakasulat ang iyang kasuko ug kahiubos sa iyang kapuyo nga gibiyaan siya kinsa miuban og laing lalaki padung sa Island Garden City of Samal (Igacos) sa Davao del Norte.
Ang amahan sa biktima nga si Manuelito Plasabas Ramos nagkumpirma nga iyang namatikdan ang iyang anak nga nagsubo gumikan sa maong hitabo.
Gipailawom sa autopsy ang patay nga lawas sa biktima nga anaa sa morgue sa Angel Funeral Homes sa dalang F. Torres ning dakbayan.
Gipatik sa mantalaang SuperBalita Davao Septembre 06, 2015.
Linkback:
https://tubagbohol.mikeligalig.com/index.php?topic=80892.0