SuperBalita Davao
Wednesday, July 2, 2014
DAVAO CITY - Patay na nga naabtan sa kapulisan ang usa ka lalaki human nagdunggab sa dughan gumikan giingong gustong makig-sex sa tagbalay nga iyang gisudlan.
Ang insidente nahitabo alas 3:00 sa hapon, Martes, didto sa Purok Salvacion, Barangay Agdao Proper, Agdao District.
Ang lalaki nailhang si Wilfredo Diaz Paghubasan, 51, ulitawo, ug residente sab sa naasoy nga dapit.
Subay sa spot report sa Sta. Ana Police Station, usa ka silingan sa maong lalaki ang mitawag sa kapulisan aron ipahibalo ang panghitabo sud sa panimalay ni Lyn Lyn (bansagon gitago), 29, molupyo sab sa dapit.
Sumala ni Lyn Lyn nga pagsaka niya sa iyang balay sa ikaduhang andana, iyang nakita nga abli og diyutay ang pultahan sa kuwarto.
Dihang iyang giablihan, gilayon siyang gitionan og kutsilyo sa suspek apan nakadagan siya ug daling gikuha ang iyang duha ka tuig nga bata nga anaa sa ubos ug nangayo og panabang sa mga silingan.
Pag-abot sa mga pulis, patay na ang maong lalaki nga dunay samad dinunggaban sa liog ug dughan.
Dugang impormasyon nga nakalap sa Superbalita nasayrang naka-brief na lang ang suspek ug buot untang makig-sex sa biktima gumikan dugay na kining nanguyab apan wa siya gisugot sa babaye.
Duna say reklamo ang mga silingan sa suspek sa mga nanglabay nga bulan sa pagpamaklad niini.
Ang patay'ng lawas sa lalaki anaa na gihaya sa kapilya sa Purok Salvacion sa nasampit nga dapit. (Jeepy P. Compio)
Linkback:
https://tubagbohol.mikeligalig.com/index.php?topic=78589.0