Wednesday, March 2, 2011
PATAY na nga nakaplagan ang usa ka kanhi overseas Filipino worker nga nakahiagum og daghang samad dinunggaban sa lawas didto sa siyudad sa Kidapawan niadtong Dominggo sa buntag.
Ang biktima nailhan nga si Crisanto Atos, 29, ulitawo ug molupyo sa Purok 3, Barangay Sudapin sa nasampit nga siyudad.
Nasayran nga banda alas 6:00 sa buntag niadtong Dominggo, nakit-an na lang ang patay nga lawas ni Atos kilid sa kanal sa Barangay Perez nga naka-angkon og daghang samad dinunggaban sa lawas.
Matud ni Laurencia nga nakasinati og suliran sa pangisip ang iyang anak sa diha nga miuli siya sa ilang dapit usa na ka bulan ang milabay gikan sa Saudi Arabia unya mosugmat-sugmat ang iyang sakit.
Ang biktima ulahing nakit-an sa mga silingan nga misuroy pa ngadto sa iyang mga barkada sa maong lugar.
Dunay pagduda ang pamilya sa biktima nga posibling gitulis siya gumikan nahanaw ang relo, kuwentas ug kuwarta sa ulitawo.
Hangtud karon blangko pa ang otoridad sa kamatayon ni Atos apan padayon silang mihimo og pagsusi sa maong hitabo. (EF)
Gipatik sa mantalaang SuperBalita Davao Marso 02, 2011.Linkback:
https://tubagbohol.mikeligalig.com/index.php?topic=38415.0