MikeLigalig.com

Ni GUAM P. LOGROÑO


USA ka mananagat namatay human naigo sa kilat samtang naglakaw sa baybayon sa Barangay Maya, lungsud sa Daanbantayan, Sugbo kagahapon, alas 10:00 sa buntag.

Si Benancio Pepito, hingkod ang panuigon, minyo ug mananagat taga Sitio Danawan, Barangay Poblacion, lungsud sa Daanbantayan patay diha-diha human nabuak ang ulo tungod sa ka kusog sa kilat.

Matod ni PO3 Victor Avenido, imbestigador sa Daanbantayan Police Station, sa wa pa ang hitabo, nagsige'g pat-akpat-ak ang uwan dungan sa pagsige'g pangilat ang langit.

Ang biktima gikatahong sayo nanagat apan nikawas sa iyang sakayan kay mipalit og pan sa tindahan kay buot mo-snack human gigutom.

Ang biktima nagkaog pan naglakaw sa baybayon padulong mibalik sa iyang sakayan dihang nakita sa mga residente sa lugar nga kalit nga dunay kusog kaayong liti ug kilat.

Naigo kini sa iyang bukobuko unya ang kusog nga boltahe sa kuryente sa kilat milahos sa iyang ulo hinungdan sa pagkabuak niini namatay siya dihadiha.

Matod ni PO3 Avenido, nakugang ang mga residente sa ilang nakita gidagan nila ang biktima kay tabangon unta pero nakita nila nga patay kini kay maayong pagkabuak sa ulo.

Gihulagway niini nga maayong pagkasunog sa lawas sa biktima sanglit nasentro sa pagkaigo sa kilat tungod sa kahawan sa dapit.

“Sa ka kusog sa kilat sir! pwerting pagkaguhayguhay sa iyang sinina dili gyud siya mabuhi," dugang ni PO3 Avenido.


Gipatik sa mantalaang SuperBalita Cebu Hulyo 28, 2015.

Linkback: https://tubagbohol.mikeligalig.com/index.php?topic=80610.0