Nila ni Lesley Caminade-vestil ug Darrel Carumba (Banat) Updated May 20, 2012 12:00 AM
CEBU, Philippines - Naputol ang ulo sa usa ka panday samtang naangol ang iyang kapuyo dihang gisung sila sa managsuon nga ilang silingan didto sa barangay Capio-an lungsod sa Argao niadtong Biyernes sa alas 4:10 sa hapon.
Ang biktima kansang lawas nabulit usab sa tinigbasan ug dinunggaban una putli sa ulo mao si Clarito Calma Nazara, 43, ulitawo nga may kapuyo, panday nga nagpuyo sa maong lugar.
Ang iyang kapuyo nga si Selvia Saragena Camajalan, 43, maoy naangol.
Samtang ang mga suspek mao ang magsuon nga si Antonio Solis, 48, ug ang iyang manghud nga si Emilio Solis, 42, pulos minyo, ug mga mag-uuma nga silingan sa mga biktima.
Si PO2 Vhon Tecson, desk officer sa Argao Police Station mibutyag sa Banat News nga ang biktima natulog na sa ilang balay dihang kalit nga miabot ang mga suspek.
Diha-diha giingong gihap-an kini ni Emilio ug gipanigbas sa iyang sanggot ug unang naigo ang tuong abaga sa biktima.
Samtang gisundan na usab unta kini ni Antonio sa pagpanigbas dihang miuwang ang asawa niini nga si Selvia hinungdan nga nasamdan ang lawas sa naulahi.
Gipanigbas na usab nila si Nazara ug nasabak na usab kini sa abaga.
Apan bisan samaron nakaambak pa kini sa bintana ug nakadagan pa paingon sa balay ni Kapitan Molly Camajalan sa barangay Capio-an.
Apan gigukod kini sa magsuong suspek ug dihang naapsan giduslak kini sa tiyan, unya nakadagan pa gyud ang biktima hangtud nga miabot kini sa pinuy-anan sa kapitan diin didto siya matumba sa kaluya na gumikan sa kadaghan nang dugo nga miagas gikan sa iyang mga samad.
Didto nakahigayon na ang duha ka suspek sa pagguyod sa biktima kansang ulo gikuptan ni Emilio samtang si Antonio usab maoy nihiwa ug miputol sa ulo niini pinaagi sa iyang sanggot.
Human mabuwag ang lawas ug ulo sa biktima, ang mga suspek miwara-wara sa ilang mga hinagiban ug misinggit nga napatay na nila ang biktima.
Diha-diha mitahan usab dayon sila ngadto sa kapolisan diin sila nagtingkagol na karon sa prisohan.
Si Antonio mibutyag sa Banat News nga wala na sila makaantos sa gihimo sa biktima ngadto kanila ilabi na kun kini mahubog ug magpunay og panghagit kanila ug magbinastos pa sa mga babaye.
Matud pa ni Antonio nga miulbo ang kagubot kagahapon atol sa birthday party sa ilang ig-agaw diin didto ang biktima nakig-inom sa ilang mga paryente ug samtang padong na sila sa ilang mga balay gikan sa ilang uma, ilang naagian ang biktima ug nakita nga nagbugal-bugal kanila uban pa sa pag-aksyon-aksyon niini og karate.
Hinungdan nga gibati nila ang kabalaka nga basin sila patyon niini maoy hinungdan nga nagkasabot silang managsuon nga ila nalang kining unahon sa pagpatay.
Sumala pa usab ni PO2 Tecson nga unom na ka tuig ang nakalabay may gipatay ang biktima nga tawo sa ilang lugar pinaagi usab sa paggulgol sa liog sa maong tawo. Apan tungod kay wala mokiha ang mga tagtungod, wala nalang usab prisoha si Nazara.
Ang maong hitabo nagpabiling lab-as sa hunahuna sa mga managsuong Solis nga basin putlan usab sila sa ulo niini, hinungdan nga nakahukom sila nga ila kining unhan.
Sa pagkakaron gipaabot nalang sa mga suspek ang kiha nga isang-at batok kanila. (WC) (BANAT NEWS)
Linkback:
https://tubagbohol.mikeligalig.com/index.php?topic=50763.0