MikeLigalig.com

(Banat) | Updated November 28, 2015 - 12:00am


CEBU, Philippines – Nahanaw ang mokabat sa P1 milyon nga kantidad sa mga alahas sa usa ka retirado’ng magtutudlo kinsa biktima sa budol-budol gang atubangan sa daku’ng mall sa Lungsod sa Consolacion alas 2 pasado sa hapon niadto’ng Huwebes. Si Police Officer 1 Retchie Guilleran sa Consolacion Police Station niila sa biktima nga si Concepcion Perez Maglasang, 77, taga Poblacion Oriental sa nahisgutang lungsod.

Matud ni Guilleran nga padulong unta sa pagsulod ang biktima sa mall apan gisugat kini sa babaye ug lalaki nga nagpaila nga mga higala sa anak niini nga tua nagtrabaho sa gawas sa nasud.

Gikombinsir dayun sa wala hiilhi’ng babaye ug lalaki ang tiguwang nga ibilin ang ila’ng bag nga napuno sa gibandol nga kuwarta ug paabuton nga sila mobalik kuyog sa ila’ng mga higala nga nagpaabot sa nag-parking nga sakyanan. Gidala sa babaye ug lalaki ang tiguwang ngadto sa nag-parking nga sakyanan diin laing tulo ka lalaki ang sakay niini. Sa pagseguro nga dili molakaw sa mao’ng dapit, giawhag sa mga mangingilad sa paghatag ngadto kanila sa mga alahas nga naglakip sa kwentas nga bulawan, singsing nga bulawan, bracelets, mga parisan sa ariyos ug uban pa nga ang tanan mokabat sa P1 milyon ang kantidad.

Gidawat sa biktima ang bag nga puno sa kuwarta ug gihatag usab niya ang mga alahas ngadto sa mga mangingilad kinsa nipabulhot sa pagpadagan pahilayo sa mao’ng dapit. Nagpaabot ang tiguwang sa usa ka kan-anan sulod sa mall apan nisawop na lang ang adlaw wala na gyud mobalik pa ang sakyanan nga giluwanan sa mga mangingilad.

Gumikan kay wala na man mobalik ang mga mangingilad, nakahukom ang biktima sa pag-abli sa gibilin nga bag ug nakurat na lang kini sa iya’ng nakita kay mga ginunting man nga papel ang sulod niini. (Romeo T. Limpangog/GMR)(BANAT NEWS)

Linkback: https://tubagbohol.mikeligalig.com/index.php?topic=81500.0