MikeLigalig.com

Ni Jojo C. Ugdol/EIM (Banat) | Updated May 21, 2015 - 12:00am
 

CEBU, Philippines - Patay ang usa ka lalaking hubog nga gipasanginlang nanulong sa balay sa iyang silingan didto sa Purok Lumboy Looc lungsod sa San Remigio pasado alas 8 sa nakalabay nga gabii.

Atol sa mao’ng hitabo tulo sab ka tawo ang naangol nga naglakip sa magtiayong gisulong ug sa igsuon sa namatay nga misulay og ulang sa nagkarambola.

Ang namatay naila nga si Ruben Giminez, 37, samtang angol ang iyang igsuong babaye nga si Everna Giminez, 26, ug ang magtiayong sila si Cancio Cabanes, 52,  kinsa maoy giingong nakapatay  kang Ruben  ug ang iyang asawa nga si Marlita, 48.

Matud pa ni Police Officer 2 Herman Bulawit, desk officer sa San Remigio Police nga nahinabi sa Banat News sayo pa nianang adlaw nahubog si Ruben ug nagsige’g panghasi sa balay sa mga Cabanes.

Apan nianang pagkagabii mibalik kini sa balay sa mga Cabanes  ug nagdala’g duha ka dos por dos ug gipusposan si Cancio kinsa padung mangasilyas ug maayong pagkabun-og sa kalawasan niini.

Sumala pa nakahigayon pagsukol si Cancio hinungdan nigawas ang asawa niining si Marlita ug nakakita sa hitabo ug gigakos iyang bana aron panalipdan kini apan gibunalan hinoon kini ni Ruben diha sa agtang ug nakuyapan.

Tungod niini, daling misulod sa balay si Cancio ug nagdala og kutsilyo apan si Ruben nakakuha ‘sab og kabilya ug nahitabo ang kombati sa duha.

Ang igsuon ni Ruben nga si Everna misuway usab og gakos kaniya apan nadunggaban kini ni Cancio sa bukton.

Si Ruben nakaangkon og samad dinunggaban sa iyang kalawasan nga nakaingon sa iyang kamatayon. Ang tulo daling gidala sa Cebu Provincial Hospital. Si Bulawit miingon nga sa nakuha nila nga impormasyon gikan sa duha ka pamilya ilang nasayran nga dili kontra ang duha ug posibling gumikan lang sa kahubog ni Ruben ang hinungdan nganong nahitabo ang karambola. (BANAT NEWS)

Linkback: https://tubagbohol.mikeligalig.com/index.php?topic=79983.0