SuperBalita Davao
Tuesday, July 30, 2013
DAVAO DEL NORTE -- Usa ka barbero ang mitugpa sa balay tambalanan human nakigdulog og babaye nga dunay kapuyo 4 sa pasado sa hapon niadtong Dominggo.
Nahitabo ang insidente didto sa Purok Sto. Niño, Barangay Visayan Village, Tagum City.
Ang biktima giila nga si Benjo Mahilum, 36, ulitawo, barbero sa Ayahay Barber Shop, Quezon Street, Barangay Magugpo West.
Samtang ang suspek giila nga si Antonio Abalos, 47, walay klarong address sa siyudad, kinsa giingong kapuyo sa usa ka Marilyn Gallarde, 32.
Nasayran sa imbestigasyon sa kapulisan nga nagdulog sila Mahilum ug Gallarde sa boarding house mismo sa biktima niadtong higayona.
Apan kalit lang nga miabot si Abalos ug misulod sa boarding house nga gikatulgan sa duruha ug dayong dunggab sa biktima sa nagkadaiyang bahin sa lawas.
Dali dayong misibat ang suspek samtang ang biktima daling gidala sa Davao Regional Hospital sa siyudad sa Tagum nga giingong kritikal ang kahimtang.
Wala pa masayri ang ulahing katikaran sa biktima sud sa ospital apan kapulisan padayon nga nangita sa suspek aron nga dakpon ug patubagon sa salaod nga nahimo. (Teddy Cabana)
Linkback:
https://tubagbohol.mikeligalig.com/index.php?topic=74285.0