MikeLigalig.com

Ni Jojo C. Ugdol (Banat) | Updated July 11, 2016 - 12:00am


CEBU, Philippines - Grabeng bun-og sa ulo ug ubang parte sa lawas ang nakaingon sa kamatayon sa usa ka 38-anyos nga lalaki human gisukmag sa ilang silingan natagak sa tulay diha sa Proper Bonbon, Brgy. Bonbon ning Dakbayan sa Sugbo.

Ang biktima giila nga si George Repiso, konduktor sa PUJ  samtang ang suspetsado mao si Harold Imesola, 22.

Sumala pa ni Senior Police Officer 2 Rommel Bancog, imbestigador sa Homicide Section sa Cebu City Police Office nga nahinabi sa Banat News igo ang miulang ang biktima sa nanag-away nga silingan.

Matud pa ni Bancog nga base sa nakuha nila nga kasayuran nakainom niadtong higayona  ang biktima.

Apan siya na hinuon ang gisukmag sa suspetsado hinungdan sa pagkabarag niini ug nahagbong sa tulay gibana-bana nga 20 ka tiil ang gilawmon paubos, giingong grabeng kadaot ang naangkon sa ulo niini.

Gidala kini sa iyang mga silingan sa Cebu City Medical Center apan paglabay sa pipila ka oras nabugtoan gayod kini sa kinabuhi.

Nadakpan ra usab dayon sa mga sakop sa Mabolo Police Station ang suspetsado nga nagtingkagol sulod sa prisohan. (BANAT NEWS)

Linkback: https://tubagbohol.mikeligalig.com/index.php?topic=82490.0