Mga ginikanan sa cyber sex nagbasol
Ni Joseph Elvir C. Tubilan
Thursday, June 2, 2011
NAGBASOL ang mga ginikanan nga nimando sa ilang menor de edad nga mga anak nga mohimog law-ay nga buhat aron sila makakwarta pinaagi sa Internet.
Bisan niini, ang National Bureau of Investigation (NBI) 7 nisang-at og tulo ka mga kaso batok sa mga ginikanan sa Cebu Provincial Prosecutor’s Office kagahapon.
Kasong kalapasan sa Republic Act (RA) 9208 kon Anti-Trafficking in Persons Act, RA 9775 kun Anti-Pornography Act ug RA 7610 kun Child Abuse ang gipasaka batok sa magtiayon dihang gipresentar nila ang ilang mga anak nga naghubo atubangan sa camera alang sa cyber pornography.
Ang operasyon giabagan sa Estados Unidos.
Ang inahan nga nagsigeg hilak dihang gidala na sila sa buhatan sa piskaliya nitumbok nga ilang gibasolan ang gihimo nila sa ilang mga anak.
“Gusto ko akong mga anak tagaan og maayong pagkaon,†nagkanayon siya nganong nabuhat niya kini.
Nitataw siya nga ang iyang paghilak tungod sa kamingaw na niya sa ilang mga anak ug buot siyang makig-estorya niini.
Iyang giangkon nga bag-ohay lang nila nga gibuhat ang kalihokan.
“Naa man na sa tibuok nga lugar. Di ra man sa amoa,†pagtug-an niya dihang gipangutana kon sila ra ba ang naghimo sa cyber pornography sa ilang dapit sa lungsod sa Cordova.
Si Cebu Provincial Assistant Prosecutor Nelia Sistoso nga maoy nidawat sa gisang-at nga mga kaso sa NBI batok sa magtiayon nipahibawo nga mopagawas og hukom ang ilang buhatan kon ipasaka ba ang kaso karong adlawa sa korte.
Matod ni Sistoso nga wa na mopirmag waiver of detention ang magtiayon busa ang mga ebidensya nga gipresentar kaniya sa mga awtoridad maoy basehan sa iyang paghukom sa kaso.
Sa pagkakaron, ang mga bata gipaubos sa diagnostic assessment sa Cebu Provincial Social Welfare and Development Office aron pagsuta kon asa nga center sila ibutang nunot sa ilang nasinati uban sa ilang mga ginikanan.
Niadtong milabayng adlaw ang Provincial Women and Children Commission uban sa NBI nga giabagan sa United States Immigration and Customs Enforcement ubos sa Deparment of Homeland Security nipahigayon sa pagpangronda sa magtiayon.
Natumbok nga mga menor de edad anaa nagpangedaron sa tres ngadto sa 15 anyos ang nalambigit niini.
Giingong magpabayad sa ilang mga customer sa Internet sa kantidad nga 20 ngadto sa 25 dolyares.
Kon buot ang kustomer nga taas nga panahon sila makatan-aw sa giingong law-ay nga gihimo sa mga bata mobayad sila og 100 dolyares.
Gipatik sa mantalaang SuperBalita Cebu Hunyo 03, 2011. Linkback:
https://tubagbohol.mikeligalig.com/index.php?topic=41332.0