MikeLigalig.com

Ni Romeo Limpangog/EIM (Banat) Updated August 03, 2011 12:00 AM


CEBU, Philippines - Nadakpan sa kapolisan ang usa ka menor de edad nga lalaking nanulis ug midunggab sa misukol nga manag-uyab nga iyaha untang biktimahon alas-10 sa miaging gabii sa plaza nga nahimutang atbang sa police station sa lungsod sa Carmen.

Ang nadakpan nga 17- anyos taga barangay Looc sa Carmen gitabangan og kulata ug nadala sa tambalanan gumikan sa mga bun-og ug pangos nga naangkon human kuninitan sa mga tawo.

Si SPO2 Simplicio Gibo sa kapolisan sa maong lungsod nga nahinabi sa Banat News miingon nga ang manag-uyab nga iyaha untang tulison mao sila si Vincent Villarba, 21, ug Nimfa Lao, 18 , nga taga barangay Liboron sa nahisgutang lungsod.

Matud pa ni Gibo nga nahitabo ang pagpanulis dihang milakaw si Villarba sa unahan kay adunay gipalit ug nahibilin ang hinigugmang babaye nga naglingkod sa maong dapit. Giduol sa suspetsado si Lao ug gitionan og kutsilyo dungan ang pagdeklarar og tulis, si Villarba pagkakita sa gibuhat sa suspek daling mibalik ug gisinggitan ang suspek.

Apan imbes modagan giharong sa suspek si Villarba ug gidunggab apan wala makaigo hangtud nga nakapunit og bato si Villarba ug gihapsan ang suspek.

Tungod sa komosyon midugok ang mga tawo ug nanawag sa polis sa atbang samtang gitabangan ang suspek ug nadakpan. Ang suspek gidala sa kapolisan ug gitugyan ngadto sa Department of Social Welfare and Development (DSWD) Region 7.  - BANAT NEWS



Linkback: https://tubagbohol.mikeligalig.com/index.php?topic=42674.0