NILANDING sa tambalanan ang usa ka security guard human naunay sa iyang kaugalingong shotgun niadtong Sabado sa Lingion, Manolo Fortich, Bukidnon.
Nadala og dali sa tambalanan mao si Franciso Loreto, taga Bugo, dakbayan sa Cagayan de Oro, kinsa sekyu sa pribadong farm sa maong dapit.
Giingong gipusil sa biktima ang latagaw nga iro nga gasulod sa farm tungod kay gapangan-on ang gansa sulod sa farm.
Apan sa pagpusil sa biktima, mibanda sa bato ang bala sa shotgun ug mipaingon sa iyang simod, hinungdan sa pagkaigo.
Tungod sa samad nga naangkon, daling gidala ang biktima sa Northern Mindanao Medical Center, dakbayan sa Cagayan de Oro.
Hinoun, anaa na kini sa luwas nga kahimtang apan padayon pa nga giatiman sa mga doktor tungod sa samad nga naangkon. (SVB)
Gipatik sa mantalaang Superbalita Cagayan de Oro Pebrero 09, 2016.
Linkback:
https://tubagbohol.mikeligalig.com/index.php?topic=81840.0