Ni KRIS C. SIALANA
GIOBSERBAHAN sa mga mananambal sulod sa Northern Mindanao Medical Center (NMMC) sa dakbayan sa Cagayan de Oro ang usa ka lalaki human miyarok og hilo niadtong Lunes sa Zone 7 Mahayahay, Claveria, Misamis Oriental.
Nilanding sa NMMC ang biktima nga si Niño Matogas, 32, lumolupyo sa nahisgutang dapit.
Sumala sa amahan sa biktima nga si Alberto nakurat na lamang siya kay nakita niya ang iyang anak nga nagbuy-od ug nagbula-bula na ang baba.
Giingong giinom sa iyang anak ang Thiodan nga insecticide para sa saging nga dala sa igsuon niini hinungdan nga nawad-an na kini sa panimuot.
Gibutyag nga posibleng depresiyon ang nagtukmod sa biktima sa pagsulay sa pagpakamatay gumikan kay aduna man kini deperensiya sa panglawas.
Gidugang pa niini nga dili makalakaw ang biktima gani igo lamang kini nga magkamang diin maoy ilang gituohang nagtukmod niini sa pagsulay sa paghunos sa hinulamang kinabuhi.
Sa pagsulat niini nga balita ang biktima ang pabilin pa nga giobserbahan sa mga mananambal ilabi na diha sa NMMC.
Gipatik sa mantalaang SuperBalita Cagayan de Oro Nobiembre 25, 2015.
Linkback:
https://tubagbohol.mikeligalig.com/index.php?topic=81492.0