Here's an update...
Pulis nagdudang lalake nag-unay og sunog
Ni ARNOLD BUSTAMANTE
NAGDUDA ang Pardo police station nga namakak ang lalakeng nangangkon nga siya gisunog sa pito ka mga tawo sa bukirang dapit sa dakbayan sa Sugbo niadtong Lunes sa buntag.
Mga pamahayag ni Daniel Uy, 27, napalgan sa kapulisan nga di tinuod dihang ilang gibisita ang Barangay Buot aron pag-imbestigar.
Ilang susihon kon wa ba magsunog sa kaugaliÂngon si Uy human buwagi sa iyang hinigugma nga taga Brgy. Sudlon 1, bukirang dapit sa dakbayan sa Sugbo.
Kini human ilang nasuta nga nisuway na kini paghikog sa miaging tuig.
Nakit-an usab siya sa dapit nga maorag wa sa kaugalingon nga nagsige og ihap sa mga kahoy.
Si Chief Insp Michael Angelo Beltran, hepe sa Pardo police station, nagÂkanayon nga duna na siyay gitahasan nga team nga mopalawom sa imbestigasyon.
Apan ang igsuong babaye ni Uy nga ilang nahinabi nitug-an nga dunay suicidal tendency ang iyang manghod.
Kon di kini mahatagan sa iyang gusto, mosuway nig kutlo sa iyang kinabuhi.
Sa inisyal nga kasayuran nga nakuha ni Beltran sa iyang mga tawo nga ningtungas sa bukid, way makatestigo nga dunay pagpanunog sa sitio Lunas, Buot.
Ang tanang lugar nga gitug-an ni Uy kanila ilang gisubay sama sa giingong punoan sa kahoy nga maoy gibitayan ug dayon siya giduslitan.
Way nakitang timailhan nga dunay agi sa sunog.
Gisaysay usab niya nga sa dihang napawong na ang kayo sa iyang lawas, nisakay siya og kabaw paingon sa Barangay Sudlon aron magpatabang.
Sa pagsusi sa kapulisan sa mga mag-uuma, way kabaw nga nawala.
Nasuta usab sa mga doktor nga gawas sa mga paso sa lawas ni Uy, duna kiniy mga samad sa tiyan nga daw sa gihiwa-hiwa agi sa blade.
Nakakuha ang mga pulis og usa ka itom nga bag sa dapit nga giingong didto siya gisunog.
Ang sulod sa bag pulos binoak nga bildo sa botelya nga posibling maoy gigamit sa paghiwa-hiwa sa iyang tiyan.
Kagahapon sa hapon, nahinabi sa mga imbestigador ang hinigugma sa biktima nga si Esmeralda Tabura, taga Brgy. Sudlon 1.
Matod niya nga moÂabot na og usa ka tuig sukad sila nagkabuwag.
Giingong na-discouraged siya tungod sa pagtuo nga duna kini deperensya sa pangisip.
Matag panahon nga iya ning buwagan, mohulga kini nga magpakamatay.
Nagkauyab ang duha sa dihang nagtungha pa sila sa college.
Gipatik sa mantalaang SuperBalita Cebu Nobiembre 05, 2015.
Linkback:
https://tubagbohol.mikeligalig.com/index.php?topic=81300.0