MikeLigalig.com

Ni STEPHANIE V. BERGANIO


ANAA sa punerarya gidala ang usa ka security guard nga giingong napalgan nga walay kinabuhi kagahapon sa buntag duol sa Laguindingan Airport, lungsod sa Laguindingan Misamis Oriental.

Giila ang biktima nga si Francisco Samson Jr., hingkod ang edad, taga Kolambog-Capistrano St., dakbayan sa Cagayan de Oro ug nagtrabaho isip security guard sa Laguindingan Airport.

Gibutyag sa kabanay sa biktima nga dili sila kumbinsido sa sulti-sulti nga ang biktima giurom hinungdan nga nakabsan sa kinabuhi tungod kay sa pagkuha nila sa patay’ng lawas sulod sa giabangan nga boarding house niini sa dapit, adunay dugo sa ilong ug baba sa biktima.

Gawas pa nga nagkadugo kini dihang napalgan.

Gitouhang niadtong Sabado pa kini nakabsan sa kinabuhi tungod kay daw wala na kini naka duty niadtong tungora ug nanimaho na usab kini hinungdan nga gisusi sa tag-iya sa boarding house nga gipuy-an niini.

Gihulat sa pamilya ning panahona ang Scene of Crimes Operatives aron masusi ang biktima tungod kay dako ilang pagtoung adunay foul play sa kamatayon niini. (SVB)


Gipatik sa mantalaang Superbalita Cagayan de Oro Hunyo 07, 2016.

Linkback: https://tubagbohol.mikeligalig.com/index.php?topic=82346.0