MikeLigalig.com

Gipatay sa bana
Ni Bryner L. Diaz, EIM (Banat) | Updated May 24, 2015 - 12:00am


CEBU, Philippines - Tungod lang sa numero sa Swertres sa lotto nga gi-maintain apan wala mapatdi,  usa ka bana ang nakapatay sa iyang asawa ug naangol usab ang suspek human nisuway paghikog sa miaging gabii diha sa Exoville, Basak Pardo, Cebu City.

Ang namatay mao si Winstil Gevirola, 31, samtang ang midunggab niya mao ang iyang banang si Renante, 32, usa ka security guard.

Si Police Officer 1 Salvador Cabasa Jr., sa Homicide Section miingon nga naabtan pa nila nga gidala sa taga Basak Pardo Emergency Response (BPER) ang suspek padulong sa tambalanan.

Sumala pa niya, ang mga mirespondeng barangay tanod sa Basak Pardo ang nidala sa suspek sa tambalanan human nila kini nasugatan sa hagdanan sa ilang balay nagsapupo sa iyang ginhawaang milugwa sa iyang tiyan samtang nagkupot pa gihapon og kutsilyo.

Nagduda si Cabasa nga natagak sa hagdanan ang suspek kay dako usab ang samad sa iyang agtang.

Dihang nahinabi sa taga Homicide ang amahan sa namatay miingon kini nga nasuko ang suspek kay wala mapustahi sa biktima ang numero niini sa swertres apan wala hinuon silay kasayoran kun migawas ba ang maong numero.

Tungod sa mainitong panaglalis mikuha og kutsilyo ang suspek ug gidunggab iyang asawa sa makadaghang higayon nga hinungdan sa iyang kamatayon. 

Human niini nagdunggab sa iyang kaugalingon ang suspek atubangan sa ilang unom ka mga anak nga nag-edad 9-anyos paubos.

Girekomendar ni Cabasa mapaubos sa stress debriefing ang mga bata tungod sa ilang nasaksihan.

Apan mireklamo ang mga imbestigador batok sa mga gwardiya sa VSMMC nga mga arogante ug wala magtug-an sa tinuod kay gipasa sila ngadto sa Cebu City Medical Center, apan sa pagkatinuod, atoa sa VSMMC ang suspek.  (BANAT NEWS)

Linkback: https://tubagbohol.mikeligalig.com/index.php?topic=80018.0